გორის რაიონულ სასამართლოში სმიტების ოჯახის მკვლელობაში ბრალდებული მალხაზ კობაურის საქმის არსებითი განხილვა გრძელდება. საქმეს ნაფიცი მსაჯულები განიხილავენ. პროკურორის განცხადებით, მათ მიერ სასამართლოში წარდგენილი მტკიცებულებები საკმარისია იმისთვის, რომ კობაურის ბრალეულობა დამტკიცდეს. რაც შეეხება დაცვის მხარეს, ბრალდებულის ადვოკატი ალექსანდრე კობაიძე ამბობს, რომ საქმეში არსებული მტკიცებულებები არასაკმარისია და მისი დაცვის ქვეშ მყოფს ჩვენება ძალის გამოყენებით მიაცემინეს. ამჯერად კი, მალხაზ კობაური ბრალს არ აღიარებს და “პრაიმ ტაიმისთვის” გამოგზავნილ წერილში მის მიმართ განხორციელებულ ზეწოლაზე საუბრობს. ის ირწმუნება, რომ სმიტების ოჯახი უცხო პირებმა დახოცეს, ხოლო დანაშაული იმ მოტივით დაფარა, რომ მის ოჯახს საფრთხე ემუქრებოდა. რაც შეეხება ზეწოლას, კობაური „პრაიმ ტაიმისთვის“ გამოგზავნილ წერილში წერს:
“მითხრეს, ნუ გეშინია, სიმართლე თქვიო. განყოფილებაში შემიყვანეს, ოთახში დამსვეს სკამზე და დამადეს ბორკილი. შემოდის ზაზა მიხაკიშვილი (პოლიციის თანამშრომელი) და მაყენებს სიტყვიერ შეურაცხყოფას. მეუბნება, რომ მომეყოლა სიმართლე. ვუთხარი, სიმართლე, რომ გითხრათ ოჯახს დამიხოცავენ-თქო. ვუთხარი პოლიცია დააყენეთ ჩემს სახლთან და შემდეგ გეტყვით-თქო. ზაზამ დაურეკა – წილკანში, მეორე რიგზე პოლიცია ამოძრავეთო. მითხრა, ახლა დაიწყე სიმართლის მოყოლაო. მოვყევი სიმართლე. ცოტა ხანი გავიდნენ გარეთ, 30 წუთის შემდეგ შემოვიდა ზაზა მიხაკიშვილი, შემოიტანა ფურცლები და დამიდო მაგიდაზე. მეუბნება, წაიკითხეო. ვუთხარი, კითხვა არ ვიცი-თქო. მე წაგიკითხავო. დაიწყო წაკითხვა. ვუთხარი ამას არ ვიტყვი-თქო.
მეუბნება, რატომ თქვი, რომ შენი ჩადენილი არ არისო. გადავიდა სიტყვიერ შეურაცხყოფაზე, გადახვეულ ქაღალდებს მირტყამდა. ნუ მირტყამ-თქო, რომ ვუთხარი წიხლი დამარტყა და სკამიდან გადამაყირავა. თავი “სტოლის“ კუთხეს ჩამოვარტყი, სახის ერთი მხარე სულ გამექლითა. შემოვიდა ერთ-ერთი პოლიციელი და ზაზას უთხრა – რას სჩადი, გაანებე თავი, ცოდოაო. გამანება თავი და მითხრა – რასაც გეტყვი, იმას იტყვიო. გავჩუმდი, ხმა არ ამოვიღე. მითხრა – თუ იტყვი, რომ შენ დახოცე, შენს ოჯახსაც დავიცავთ და შენც შიდაპატიმრობას მოგცემთო. კარგი, ვიტყვი-თქო. დამაზეპირებინეს და მომაყოლეს ბევრჯერ. შემდეგ, როცა მათი დაზეპირებული სიტყვები მომაყოლეს შევეკითხე, ციხეში გამიშვებთ, თუ შიდაპატიმრობას მომცემთ-თქო. შიდაპატიმრობასო – მითხრა.
შემდეგ გამიყვანეს გარეთ, ამიღეს სისხლი, თმები, ფრჩხილები, ნერწყვი და სხვა ნიმუშები. ზაზამ მითხრა, ახლა გამომძიებელთან გაიმეორე ის სიტყვები, რაც ჩვენ მოვყევით, შემდეგ მთაში წაგიყვანენ და აჩვენე ის ადგილები, სადაც დახოცეს, მაგრამ უთხარი, რომ ვითომ შენ დახოცეო. გამიყვანეს გამომძიებელთან და მოვყევი, რაც ზაზამ მითხრა. მითხრეს, ხელი მომეწერა რაღაც ფურცლებისთვის, არ ვიცოდი იქ რა ეწერა, რა ფურცელი რას ნიშნავდა. ვუთხარი, ვერ მოვაწერ ხელს-თქო. ხელის მოკიდებით მომაწერინეს და წამიყვანეს მთაში.
გზაზე, ქვეშეთის ხიდთან გააჩერეს მანქანა, ზაზა მოვიდა და მითხრა, რაც გითხარი ყველაფერი ისე გააკეთე, მე უნდა წავიდე, შენი ოჯახის წევრებთან დავაყენებინო დაცვა და მოსამართლეს დაველაპარკო, რომ შიდაპატიმრობა მოგცესო. ამიყვანეს ჩანჩქერზე და იქიდან დაიწყო გამოძიება მუქარით, ძალადობით და ტყუილით“, – წერს “პრაიმტაიმისთვის“ გამოგზავნილ წერილში სმიტების ოჯახის მკვლელობაში ბრალდებული მწყემსი.
შეგახსენებთ, სმიტების ოჯახი გასული წლის 4 ივლისს ხადას ხეობაში გარდაცვლილები ნახეს, ხოლო 7 ივლისს სამართალდამცველებმა ბრალდებულის სახით მალხაზ კობაური დააკავეს. წყარო: პრაიმ ტაიმი