შინაგან საქმეთა მინისტრის გიორგი გახარიას განცხადებით, დღეს ყველაზე დიდი გამოწვევა ქურდობაა, რომელიც ყოველი მესამე დანაშაულია. მისი თქმით, დღეს უწყებისთვის კრიმინალური მენტალიტეტი გამოწვევაა და ასევე დანაშაული, რომელიც მოტივირებულია ნარკოდანაშაულით და სხვა სოციალური მოტივებით. ამის შესახებ შს მინისტრმა “იმედი LIVE”-ის ეთერში განაცხადა.
შს მინისტრის განცხადებით, უწყება სისხლის სამართლის კოდექსის გარკვეული მიმართულებით კორექტირების აუცილებლობას ხედავს.
“ჩვენ გვჭირდება სისხლის სამართლის კოდექსის გარკვეული კორექტირება. ის სტატისტიკური მონაცემები რომლებიც ერთ წლის განმავლობში დავაგროვეთ გვაძლევს საშუალებას, რომ დავჯდეთ და ღრმა ანალიზის საფუძველზე დავიწყოთ მსჯელობა, მათ შორის ოპოზიციასთან და არასამთავრობო სექტორთან, თუ რა სახით და რა მიმართულებით უნდა მოხდეს სისხლის სამართლის პოლიტიკის ცვლილება.
კრიტიკულად მნიშვნელოვანია არა გამკაცრება, არამედ ჩვენთვის მიზანია ეფექტურობა, გამკაცრება თვითმიზანი არ არის.
ჰუმანურობა არის მისასალმებელი და ჩვენ ამ გზას უნდა დავადგეთ. არანაირ წარმატებას არ ექნება ფასი თუ ადამიანის უფლებების დაცვა შესაბამის სტანდარტზე არ შევინარჩუნეთ. თუმცა ვამბობთ რომ ეფექტურობის ნაწილში როგორიც არის ქურდობა, ოჯახში ძალადობა, კრიმინალური მენტალიტეტი, ეს არის ჩამოყალიბებული სურათი – შსს დეტალების დონეზე ხედავს, აფასებს სწორად სიტუაციას და აქვს გეგმა რომელსაც ახორციელებს იმისთვის, რომ ის რისკები რომელიც აქვს ჩვენ მოქალაქეებს, აუცილებლად გადაწყვიტოს”, – განაცხადა შინაგან საქმეთა მინისტრმა გიორგი გახარიამ.