“მესმის დამოუკიდებლობის 100 წლის აღნიშვნა, მაგრამ რეგლამენტის 100 დღის აღნიშვნა მხოლოდ „ქართული ოცნების“ გუნდს შეუძლია, რომელიც თვითკმაყოფილების მორევში ასე სიამოვნებით ეშვება”, – ამ სიტყვებით საპარლამენტო უმრავლესობის წევრებს „ევროპული საქართველოს“ ლიდერმა, გიგა ბოკერიამ მიმართა. ბოკერიას თქმით, ახალი რეგლამენტი მთავრობის კომფორტზეა მორგებული.
„ყოველთვის ცუდია, როდესაც უკანონობას არგებ კანონს, მაგრამ ამანაც ჩაიარა. რაც მიიღეთ – მიიღეთ და ას დღეს ზეიმობთ, ახლა. რა ხდება ამის მერე?! ჯერ გახარიამ დაარღვია რეგლამენტი, როდესაც კომიტეტზე მოვიწვიეთ და თქვა – სესია მირჩევნიაო. ახლა, ქვეყნის უმწვავეს სკანდალზე ეროვნული ბანკის პრეზიდენტი კომიტეტზე დავიბარეთ და იძახის, სესიაზე მოვალო, ანუ რა გამოდის: ეს საზეიმო დოკუმენტი რომ მივიღეთ, მივიღეთ კომფორტული სიტუაციებისთვის?! მოგმართავთ თქვენ, ვინც თავმომწონედ აფრიალებთ დროშებს, ამ რეგლამენტით დიდი გარღვევა გვაქვსო – თქვენ გგონიათ, რომ რეგლამენტის იგნორირება, როდესაც ოპოზიციის მოთხოვნაა, ეს ოპოზიციის სისუსტის პრობლემაა?!- მაგრად ცდებით. ეს თქვენი სისუსტის პრობლემაა. თქვენი პოლიტიკური შეურაცხყოფაა, მთელი პარლამენტის, როგორც ინსტიტუტის დამცირებაა. მაინტერესებს, გეგმავთ თუ არა, რომ თქვენი პოლიტიკური თავმოყვარეობა დაიცვათ მაშინ, როდესაც მთავრობის წარმომადგენელი უტიფრად გეუბნებათ, რომ ფეხებზე კიდია კანონის მოთხოვნები და პარლამენტი?!“ – განაცხადა ბოკერიამ.
ბოკერია უმრავლესობას: თქვენ გგონიათ, რეგლამენტის იგნორირება, როცა ოპოზიციის მოთხოვნაა, ეს ოპოზიციის სისუსტის პრობლემაა?
2019/04/02 19:13:10
ნანახია: 892 ჯერ