საქართველოს კარატეს ფედერაციის პრეზიდენტი 15 ათას ლარიანი გირაოს საფუძველზე გაათავისუფლეს. ინფორმაციას „ინტერპრესნიუსი“ ავრცელებს.
კახა ბასილაია სახელმწიფო უსაფრთხოების ანტიკორუფციულმა სააგენტომ სამსახურეობრივი მდგომარეობის გამოყენებით, სახელმწიფოს კუთვნილი დიდი ოდენობით თანხის თაღლითურად დაუფლების ფაქტზე ბრალდებულის სახით სისხლის სამართლის პასუხისგებაში მისცა.
ბასილაის თქმით, მისთვის სუს-ის ნაბიჯი გაუგებარია. მისი განმარტებით, ამით მხოლოდ კარატეს ფედერაციამ იზარალა.
„მე ვარ არჩეული პრეზიდენტი, ვინც ამირჩია, ისევ მათ უნდა გადამაყენონ. ფედერაციაში ამაზე საუბარიც კი არ არის. 2020 წელი არის ოლიმპიური თამაშების წელი, ბევრი საქმეა გასაკეთებელი და მართლაც, სერიოზული ფული მაქვს საშოვნი. ამის ფონზე, თითიდან გამოწოვილ ბრალდებას მიყენებენ, რომელიც რას ემსახურება, მართლა არ მესმის, სასაცილო ბრალდება წამიყენეს“, – აცხადებს კახა ბასილია.
დანაშაულის ჩადენისათვის კახა ბასილაიას საქართველოს სსკ-ის 180-ე მუხლის მე-3 ნაწილის ,,ა” და „ბ“ ქვეპუნქტებით გათვალისწინებული ბრალდება წარედგინა, რაც სასჯელის სახით 6-დან 9 წლამდე ვადით თავისუფლების აღკვეთას ითვალისწინებს.
როგორც ბასილასია „ინტერპრესნიუსთან“ აცხადებს, ის კარატეს ეროვნული ფედერაციის პრეზიდენტის პოსტზე რჩება.