მხილებულია ორი ადამიანი, რომლებიც სხვადასხვა რეგიონში დაბალ ფასად ყიდულობდნენ ცხენისა და ვირის ხორცს, შემდეგ მას თბილისში მდებარე ერთ-ერთ ობიექტზე, კუსტარულად მოწყობილ ე.წ. ბოინში ამუშავებდნენ, მოგვიანებით კი ბაზრობებსა და სხვადასხვა კვების ობიექტზე საქონლის ხორცის სახით ყიდდნენ. ამის შესახებ ინფორმაციას ფინანსთა სამინისტროს საგამოძიებო სამსახური ავრცელებს.
უწყების ცნობით, საგამოძიებო სამსახურმა, სუსის ანტიკორუფციულ სააგენტოსთან და სესთან თანამშრომლობით, ეს პირები დააკავა. უწყების ინფორმაციით, საგამოძიებო მოქმედებების შედეგად, ბაზრობაზე, ასევე რამდენიმე ობიექტზე ამოღებულია დიდი ოდენობით ხორცი, რომელიც ექსპერტიზის დასკვნის თანახმად, შეიცავს ცხენის და ვირის დნმ-ს. ასევე ე.წ. ბოინში იპოვეს ცხენისა და ვირის სხეულის ნაწილებიც.
გამოძიება საქართველოს სისხლის სამართლის კოდექსის 180-ე მუხლის მეორე ნაწილით მიმდინარეობს, რაც სასჯელის სახით ითვალისწინებს თავისუფლების აღკვეთას ვადით ოთხიდან შვიდ წლამდე ვადით.