თანაინვესტირების ფონდის საზოგადოებასთან ურთიერთობის სამსახურის ხელმძღვანელი ნუცა ქისტაური “რუსთავი2”-ის საინფორმაციო სამსახურის ხელმძღვანელსა და შაბათის კურიერის წამყვან ნოდარ მელაძეს პასუხობს, რომელიც პანორამა თბილისის მშენებლობაზე დაშავებული მუშების შესახებ გასულ სიუჟეტს ეხება.
“პირველ რიგში ძალიან უხერხულია, როცა ასე საჯაროდ ცდილობს ადამიანი (არ აქვს მნიშვნელობა მის პროფესიულ საქმიანობას) მცდარი ინფორმაციის გავრცელებას.
ბატონო ნოდარ, მე თქვენთვის ნამდვილად არ მითქვამს რომ „არ მცალია“, როგორც სატელეფონო საუბრისას შეგატყობინეთ, ვიყენებ ჩემს მოქალაქეობრივ უფლებას და ვიმყოფები დეკრეტში მიუხედავად ამისა, გამომდინარე იქიდან რომ მხოლოდ და მხოლოდ ჩემი ნება-სურვილით კვლავ ვარ ჩართული ფონდის საქმიანობაში, გითხარით რომ გადმოგირეკავდით და დეტალურად მოგახსენებდით ყველა იმ საჭირო კითხვაზე თუ სადავო საკითხზე პასუხს. თუმცა თქვენ მაინც წერთ, რომ თითქოს „არ მეცალა“ და შესაბამისად ჩემგან პასუხიც კი ვერ მიიღეთ.
გთხოვთ, მაჩვენოთ ჩანაწერი სადაც მე გეუბნებით რომ „არ მცალია“, სამწუხაროდ ასეთ ჩანაწერს ვერ წარმოადგენთ… საბედნიეროდ ვერც ერთი ჟურნალისტი, ვისთანაც შეხება მქონია წლების განმავლობაში, ვერ იტყვის რომ როდესმე მე მათთვის ან არ მეპასუხა ან მსგავსი უხეში პასუხით დამესრულებინა მათთან საუბარი.
რაც შეეხება 2019 წლის 17 აპრილს, რუსთავი 2-ის ეთერში, კერძოდ გადაცემაში „კურიერი“ გასულ სიუჟეტს პანორამა თბილისისა და სამი დაშავებული მუშის თაობაზე, მინდა კიდევ ერთხელ აღვნიშნო, რომ სიუჟეტში არა ერთი მცდარი ინფორმაცია გაჟღერდა, რაც ჩვენს მიერ გავრცელებულ რელიზში ცხადად არის მოყვანილი. ამასთანავე, შეგიძლიათ პირადად დაუკავშირდეთ შრომის ინსპექციის წარმომადგენლებს, რომლებიც თავად მოგახსენებენ რომ ობიექტზე შესვლა ყოველგვარი შეფერხების გარეშე შეძლეს.
და ბოლოს, ფაქტია ჩემი საკონტაქტო ინფორმაციაც გქონიათ ბატონო ნოდარ, თუმცა ჩვენს პრესსამსახურს არავინ დაკავშირებია. სოციალური ქსელის მეშვეობით თქვენთან საუბარს ნამდვილად აღარ ვაპირებ, ვინაიდან სრული 10 წუთის განმავლობაში ისედაც გვქონდა სატელეფონო საუბრის შესაძლებლობა. ვიმედოვნებ, სამომავლოდ მაინც გაითვალისწინებთ და ჟურნალისტური გამოძიების სრულფასოვნად ჩატარების მიზნით აუცილებლად დაუკავშიდებით შესაბამისი უწყებების პრესსამსახურებს.
გისურვებთ წარმატებებს პროფესიულ საქმიანობაში!”– წერს ნუცა ქისტაური ფეისბუქში.