პანკისში ინციდენტის დროს დაშავდნენ როგორც ადგილობრივები, ისე შინაგან საქმეთა სამინისტროს თანამშრომლები.
დაშავებულ მოსახლეობას დახმარება ადგილზე გაეწია, ხოლო სამართალდამცველები თელავის რეფერალურ საავადმყოფოში გადაიყვანეს. მათ მოსახლეობის მიერ ქვების სროლის დროს სხეულის სხვადასხვა სახის დაზიანება მიიღეს.
“სამი პოლიციელია ამ წუთებში საავადმყოფოში შემოყვანილი. ძირითადად პაციენტებს გარეგანი დაზიანებები აღენიშნებათ. მათ სიცოცხლეს საფრთხე არ ემუქრება. მდგომარეობა სტაბილურია,“- განაცხადა თელავის რეფერალური საავადმყოფოს დირექტორმა ხათუნა ჭონიაშვილმა.
პანკისის ხეობის მოსახლეობის ნაწილი თელავში, პოლიციის სამმართველოში წავიდა, სადაც შს მინისტრის მოადგილე კახა საბანაძემ აქციის მონაწილეები მოლაპარაკებებისთვის მიიწვია. ახლა პანკისის ხეობაში სიმშვიდეა. ადგილზე რჩებიან სპეცდანიშნულების რაზმის წარმომადგენლები. ასევე აქციის მონაწილეები. ჰესის სამშენებლო სამუშაოები ამ დროისთვის შეჩერებულია.
პანკისის ხეობაში მოსახლეობასა და სპეცდანიშნულების რაზმს შორის დაპირისპირება მოხდა. სპეცრაზმმა აქციის მონაწილეების წინააღმდეგ ცრემლმდენი გაზი გამოიყენა. ადგილზე მოსახლეობა დაგეგმილი ჰესის მშენებლობას აპროტესტებს. მშენებლობის დაწყება დღეს იგეგმებოდა.