პოლიციელებზე ძალადობრივი ქმედება ნებისმიერ სახელმწიფოში მიუღებელია, მით უმეტეს მიუღებელია ეს სახელმწიფოში, რომელსაც აქვს ოკუპირებული ტერიტორიები, – ასე გამოეხმაურა საქართველოს პრეზიდენტი სალომე ზურაბიშვილი პანკისში გუშინ განვითარებულ მოვლენებს.
პრეზიდენტმა რამდენიმე წუთის წინ გამართულ ბრიფინგზე დასძინა, “მისასალმებელია, რომ შს მინისტრის ხელმძღვანელობით შესაძლებელი გახდა ხეობაში ვითარების დამშვიდება.”
რაც შეეხება შექმნილი დაძაბულობის მიზეზს, კერძოდ კი – ჰესის მშენებლობას, ზურაბიშვილმა ხაზი გაუსვა, რომ ქვეყანას ეკონომიკური წინსვლა სჭირდება, ამასთან, მისივე თქმით, აუცილებელია ჰესის მშენებლობის გადაწყვეტილებას სრული გეოლოგიური კვლევა ამყარებდეს, ასევე საფრთხეების კომპლექსური შეფასება და საზოგადოების ჩართულობა.
„მინდა, გამოვეხმაურო პანკისის ხეობაში განვითარებულ მოვლენებს, უნდა ვთქვა, რომ პოლიციელებზე ძალადობრივი ქმედება ნებისმიერ სახელმწიფოში მიუღებელია, მით უმეტეს მიუღებელია ეს სახელმწიფოში, რომელსაც აქვს ოკუპირებული ტერიტორიები, რომლისთვისაც საზღვრების დაცულობა და სტაბილურობა არის სასიცოცხლო მნიშვნელოვანის ამოცანა. მისასალმებელია, რომ შს მინისტრის ხელმძღვანელობით შესაძლებელი გახდა ხეობაში ვითარების დამშვიდება. რაც შეეხება შექმნილი დაძაბულობის მიზეზს, ჰესის მშენებლობას, ხაზი მინდა გავუსვა, რომ ქვეყანას სჭირდება ეკონომიკური წინსვლა, ამავე დროს აუცილებელია ჰესის მშენებლობის გადაწყვეტილებას ამყარებდეს სრული გეოლოგიური კვლევა, საფრთხეების კომპლექსური შეფასება და საზოგადოების ჩართულობა. ვიმედოვნებ, რომ მომავალში სწორედ ამ კრიტერიუმით ვიმოქმედებთ და ასევე განვახორციელებთ სახელმწიფოს გაძლიერებისთვის მნიშვნელოვან პროექტებს“, – განაცხადა საქართველოს პრეზიდენტმა სალომე ზურაბიშვილმა.