ხობის მუნიციპალიტეტის სოფელ ძველ ხიბულაში წყლის სისტემის მოწყობის მიზნით, აზომვით სამუშაოები დაიწყო.
პროექტის ტექნიკური დავალება უკვე მზადაა. უახლოეს პერიოდში დაიწყება მშენებლობის პროექტის მომზადება.
მიმდინარე სამუშაოებს წყალმომარაგების კომპანიის დირექტორი ეკატერინე გალდავა, ხობის მუნიციპალიტეტის მერთან გოჩა ქაჯაიასთან და ფონდ ქართუს წარმომადგენელ ვახტანგ ცაგარელთან ერთად ადგილზე გაეცნო.
წყალმომარაგების პროექტის ფარგლებში გაკეთდება წყლის ჭაბურღილები და სათავე ნაგებობა, მოეწყობა ახალი ქსელი.
პროექტის განხორციელება საბოლოოდ აღმოფხვრის სოფლის წყალმომარაგების პრობლემას და ადგილობრივებს სასმელი წყლის 24-საათიანი მიწოდებით უზრუნველყოფს.
სოფელ ძველ ხიბულაში წყალმომარაგების პრობლემის აღმოფხვრას ადგილობრივებს „ქართული ოცნების“თავმჯდომარე ბიძინა ივანიშვილი დაპირდა. იგი ხიბულაში 29 მარტს იმყოფებოდა. ასევე გადაწყდა, რომ მოწესრიგდება სოფლის ინფრასტრუქტურა, რეაბილიტაცია ჩაუტარდება მთავარ და შიდა გზებს, მოხდება გაზით უზრუნველყოფა და აშენდება ახალი საბავშვო ბაღი.