სოსო ფხაკაძე – პოლიტიკოსი არ ვარ, ბიზნესის ენაზე გპასუხობთ

ინფორმაციას, რომ რუსული „როსნეფტი“ „ვისოლის“ შეძენით არის დაინტერესებული, „ვისოლ ჯგუფის“ ხელმძღვანელი, „საქართველოს ბიზნესასოციაციის“ პრეზიდენტი, სოსო ფხაკაძე უარყოფს.
თუმცა, ფხაკაძის თქმით, ბიზნესი და პოლიტიკა გამიჯნულია და ის, როგორც ბიზნესმენი, მზად არის, დაელაპარაკოს ყველა ქვეყნის წარმომადგენელს.
“ობიექტურად რომ გითხრათ, რუსულმა კომპანიამ საქართველოში ავტოგასამართი სადგურების რომელიმე ქსელი რომ იყიდოს, ამით საქართველოს ეკონომიკას რა საფრთხე შეიძლება დაემუქროს, არ მესმის”, – აღნიშნა ფხაკაძემ.
მისივე თქმით, ის არ არის პოლიტიკოსი და საკითხს როგორც ბიზნესმენი, ისე აფასებს.
„პოლიტიკოსი არ ვარ, მე ბიზნესის ენაზე გპასუხობთ, რომ არის სტრატეგიული აქტივები, რომლებთან მიმართებითაც საფიქრებელია, ვინ იქნება მათი მფლობელი. რასაკვირველია, ჩვენ, პირველ ყოვლისა, ქვეყნის მთლიანობა გვაწუხებს. ამაზე საუბარი არ არის. თუ ჩვენ გავმსხვილდებით, ეს, მხოლოდ და მხოლოდ, წაადგება ქვეყნის ეკონომიკას. რაც შეეხება რუსული კომპანიების მონოპოლიის საფრთხეს – საერთოდ, მონოპოლია ყოველთვის საფრთხეა და ამას ხელისუფლება არ დაუშვებს”, – აცხადებს ფხაკაძე.