ფაიფურის დასახლებაში #87-ე უბანთან მომხდარ ინციდენტთან დაკავშირებით 2 მოქალაქე დააკავეს. შსს-მ გამოძიება სისხლის სამართლის 87-ე მუხლით დაიწყო, რაც იარაღის უკანონოდ შეძენა-შენახვა-ტარებას გულისხობს.
„ქრონიკის“ ინფორმაციით, ერთ-ერთი დაკავებული საოლქო საარჩევნო კომისიის მუდმივმოქმედი წევრის შვილია.
დღეს გავრცელდა ინფორმაცია, რომ ზუგდიდის #87 უბანზე „ნაციონალური მოძრაობის“ დამკვირვებელ ზოია ქვარცხავას იარაღი დაუმიზნეს და შემდეგ ჰაერში გაისროლეს.
შსს-მ დაკავებასთან დაკავშირებით ოფიციალური განცხადება გაავრცელა:
„შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტის ზუგდიდის რაიონული სამმართველოს თანამშრომლებმა, ცეცხლსასროლი იარაღის მართლსაწინააღმდეგო შეძენა-ტარების ბრალდებით 2 პირი: 1999 წელს დაბადებული ი.ჩ. და 2000 წელს დაბადებული ბ.გ. დააკავეს. დანაშაული 4-დან 7 წლამდე ვადით თავისუფლების აღკვეთას ითვალისწინებს.
გამოძიების ინფორმაციით ბრალდებულებმა ზუგდიდში, ჭავჭავაძის ქუჩაზე, ჰაერში რამდენიმე გასროლა განახორციელეს და შემთხვევის ადგილიდან მიიმალნენ. სამართალდამცველებმა დანაშაულის ჩადენის იარაღი ნივთმტკიცებად ამოიღეს, რაზეც დანიშნულია შესაბამისი ექსპერტიზა. გამოძიება ცეცხლსასროლი იარაღის მართლსაწინააღმდეგო შეძენა-ტარების ფაქტზე მიმდინარეობს, საქართველოს სისხლის სამართლის კოდექსის 236-ე მუხლით“, – აცხადებს შსს-ში.
მომხდარ ინციდენტს ოპოზიციაშიც გამოეხმაურნენ. მათ ვიდეომასალა წარმოადგინეს, სადაც მათი მტკიცებით, ჩანს ის ავტომობილი, საიდან გადმოსულმა პირებმაც გაისროლეს. იგივე ავტომობილი, თინა ბოკუჩავას თქმით, 14 მაისს საოლქო საარჩევნო კომისიასთანაც ნახეს. ოპოზიციაში ამტკიცებენ, რომ ამ უბანზე ჰქონდათ სიების გატაცების მცდელობა.