გადასახადის გადამხდელთა კავშირი უკმაყოფილებას გამოთქვამს 2019 წლის 31 მაისს საქართველოს საბაჟო ტერიტორიაზე საქონლის გადაადგილებისა და გაფორმების შესახებ ინსტრუქციაზე მინისტრის ბრძანებაში შესულ ცვლილებასთან დაკავშირებით.
როგორც კავშირის მიერ გავრცელებულ განცხადებაში წერია, ფინანსთა მინისტრის მიერ 31 მაისით დათარიღებული ცვლილება ბიზნესისთვის მოულოდნელი იყო.
“კერძოდ, აღნიშნული ბრძანებით გაუქმებული იმპორტის გადასახდელების გადახდის საშეღავათო პერიოდი გაზრდის იმპორტიორი კომპანიბის მხრიდან ნაღდ ფულზე მოთხოვნას, რაც, ისედაც ფინანსებზე გართულებული წვდომის პირობებში, მხოლოდ ნეგატიურად აისახებ მათ ფინანსურ მდგომარეობაზე”, – აცხადებენ კავშირში.
მათი თქმით, გაუგებარია, ერთი მხრივ, რით იყო გამოწვეული აღნიშნული გადაწყვეტილების მიღება, ხოლო მეორე მხრივ, რა საჭირობას წარმოადგენდა ასეთი სიჩქარე. “მსგავსი ცვლილებები არ უნდა შედიოდეს მყისიერად ძალაში და ბიზნესს უნდა ეძლეოდეს გონივრული ვადა ადაპტაციისთვის. მოვუწოდებთ ფინანსთა სამინისტროს ბიზნესთან კონსულტაციისკენ”, – აცხადებენ კავშირში.