დავით ჭიჭინაძე – როგორც ჩანს, ფსონი, ამჯერად მამუკა ხაზარაძეზე იდება

“მევახშეებით ახალი პოლიტიკური სახეები არ იქმნება. მამუკა ხაზარაძე პოლიტიკაში მხოლოდ თავის თავის გადასარჩენად შემოდის”, – ასე ეხმაურება პარლამენტის დამოუკიდებელი დეპუტატი, დავით ჭიჭინაძე ბიზნესმენ მამუკა ხაზარაძის მიერ საზოგადოებრივი მოძრაობის დაფუძნების შესახებ გავრცელებულ პოსტს.
„მევახშეებით ახალი პოლიტიკური სახეები არ იქმნება. მამუკა ხაზარაძე პოლიტიკაში მხოლოდ თავის თავის გადასარჩენად შემოდის. რადგან დღეს მხოლოდ მიშა „აცოცხლებს“ ივანიშვილს, რადგან „ევრონაცებმა“ ალტერნატიული ძალის – „არა მიშას“ – შექმნა ვერ მოახერხეს და ამ ეტაპზე მათი მხოლოდ მარგინალიზება ხდება, როგორც ჩანს, ფსონი, ამჯერად, მამუკა ხაზარაძეზე იდება, როგორც ე.წ. ახალი პროდასავლური მოდელის, შედარებით ნაკლებად ცუდი ისტორიით. თუმცა ეს ვითომ „ნაკლებად ცუდი ისტორია“ რამდენად დაიტევს საბანკო სისტემის განუკითხაობისა და ბანკირების თავგასულობისგან დაზარალებულ ადამიანების ჯარს თავისი წართმეული ქონებებით, ამას უკვე დრო გვაჩვენებს“, – აცხადებს ჭიჭინაძე.
შეგახსენებთ, რომ ბიზნესმენი მამუკა ხაზარაძე სექტემბერში ახალ საზოგადოებრივ მოძრაობას აფუძნებს. ამის შესახებ მან სოციალურ ქსელში დღეს დაწერა.