თუშეთში სამძებრო ოპერაცია განახლდა

თუშეთში ავტომანქანის ხევში გადავარდნის შედეგად დაკარგული 18 წლის ახალგაზრდის ძებნა დილიდან განახლდა. ​ფშაველი-აბანო-ომალოს საავტომობილო გზა სოფელ ლეჩურის მიმდებარე ტერიტორიიდან ომალომდე გადაკეტილია. გზის გადაკეტვა სამაშველო ოპერაციის ჩასატარებლად გახდა საჭირო.
როგორც შს სამინისტროს საგანგებო სიტუაციების მართვის სამსახურიდან აცხადებენ, იგეგმება ხეობაში მძიმე ტექნიკის შეყვანა 27 ივლისს ავტოსაგზაო შემთხვევის დროს ხევში გადავარდნილი სატვირთო ავტომობილის ამოსაყვანად. ამ დროისთვის, მაშველებმა 6 მოქალაქის ცხედრის პოვნა და ხევიდან ამოყვანა შეძლეს. მთელი ღამის განმავლობაში ხეობაში, მონიტორინგის მიზნით, იმყოფებოდნენ პოლიციის ეკიპაჟები და სამაშველო ჯგუფები.
მომხდარ ფაქტთან დაკავშირებით გამოძიება სსკ-ის 276-ე მუხლის მე-5 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა გამოიწვია.