მოლაპარაკებების მერვე რაუნდი შეთანხმების შესახებ, რომლის თანახმადაც აშშ-მ ავღანეთში ომი უნდა დაასრულოს და იქიდან საკუთარი ჯარი გაიყვანოს, დღეს დასრულდა, – ამის შესახებ რადიკალურმა ორგანიზაცია „თალიბანმა“ განაცხადა.
სააგენტო „ როიტერსის“ ინფორმაციით, „თალიბანის“ პრესსპიკერმა ზაბიჰულაჰ მუჯაჰიდმა განმარტა, რომ მოლაპარაკებები ორშაბათს დილით დასრულდა და „ორივე მხარემ მიიღო გადაწყვეტილება შემდგომი მოქმედებების თაობაზე კონსულტაციები თავიანთ ლიდერებთან გაიაროს.“
აღნიშნულზე კომენტარი აშშ-ის ოფიციალურ პირებს ჯერჯერობით არ გაუკეთებიათ, თუმცა აშშ-ის მთავარმა მომლაპარაკებელმა, ავღანელ-ამერიკელმა ვეტერანმა დიპლომატმა ზალმაი ხალიზადმა კვირას განაცხადა, რომ მიმდინარეობდა რთული სამუშაო „მყარი და ღირსეული სამშვიდობო შეთანხმების მისაღწევად და ისეთი დამოუკიდებელი ავღანეთისთვის, რომელიც საფრთხეს არც ერთ ქვეყანას უქმნის.“
შეთანხმებამ, რომლის მისაღწევად აშშ-ისა და „თალიბებს“ შორის მოლაპარაკებების ბოლო რაუნდი კატარში გაიმართა, პრეზიდენტ დონალდ ტრამპს ავღანეთში, 2001 წლის 11 სექტემბრის ტერაქტის შემდეგ დაწყებული ომის დასრულების საშუალება უნდა მისცეს.
შეთანხების პაქტი, სავარაუდოდ, თალიბებს ავალდებულებს, ავღანეთის აშშ-ის მიერ მხარდაჭერილ მთავრობასთან ხელისუფლების განაწილებაზე მოლაპარაკებები აწარმოოს, თუმცა სავარაუდოდ, არ ითვალისწინებს „თალიბების“ მიერ ცეცხლის შეწყვეტის ვალდებულებას, რაც იმის ალბათობას ქმნის, რომ ამბოხებულები მას შემდეგ, რაც აშშ ავღანეთს დატოვებს, ბრძოლას დაიწყებენ.
მდგომარეობას ართულებს ისიც, რომ ავღანეთის პრეზიდენტი აშრაფ ღანი მოლაპარაკებებში არ მონაწილეობს და აცხადებს, რომ „ავღანეთის ბედი ავღანეთშივე უნდა გადაწყდეს და არა მის ფარგლებს გარეთ.“