ეკონომიკისა და მდგრადი განვითარების მინისტრობის კანდიდატის განცხადებით, 20-21 ივნისს განვითარებულმა მოვლენებმა, რომლებიც ინსპირირებული იყო რევანშისტულად განწყობილი, უპასუხისმგებლო პოლიტიკური ძალების მიერ, რადიკალურად შეცვალა ტურიზმის აღმავალი ტენდენცია.
ნათია თურნავამ ამის შესახებ პარლამენტში კომიტეტების ერთობლივ სხდომაზე გამოსვლისას ისაუბრა. მისი თქმით, უკვე ივლისის თვეში სამწუხაროდ, ტურისტულმა დარგმა, მცირე ბიზნესმა და ჩვენმა მოსახლეობამ 58 მილიონი აშშ დოლარის შემოსავალი დაკარგა, ხოლო შედეგად, მოსალოდნელი მაღალი ზრდის ნაცვლად, შვიდი თვის მონაცემებით, ტურიზმის სექტორის ზრდამ სულ 2.1 პროცენტი შეადგინა.
„ამასთან, მთავრობა დროულად ჩავერთო ამ პროცესში. ჩვენ მოვახერხეთ ნეგატიური ზემოქმედების ნაწილობრივი შერბილება. თუმცა მისი სრული ნეიტრალიზაცია შეუძლებელი აღმოჩნდა, რადგან დაზარალდა არა მხოლოდ ტურიზმი, არამედ მომიჯნავე სფეროებიც. ცალსახად შეგვიძლია ვთქვათ, რომ არა 20-21 ივნისის მოვლენები, საქართველოს ეკონომიკური ზრდა უფრო მაღალი და ხელშესახები იქნებოდა“, – განაცხადა ეკონომიკისა და მდგრადი განვითარების მინისტრობის კანდიდატმა.