საქართველოს პარლამენტის დღევანდელ სხდომაზე ერთმანეთს სიტყვიერად მამუკა მდინარაძე და გიგა ბოკერია დაუპირისპირდნენ.
დაპირისპირების მიზეზი უმრავლესობის დეპუტატის შოთა ხაბარელის კითხვა გახდა, რომელიც მან ბოკერიას მისამართით დასვა.
შოთა ხაბარელმა პარლამენტში სიტყვით გამოსვლისას ქართველი სპორტსმენების მიღწევებზე ისაუბრა და ამ მიმართულებით ხაზი გაუსვა ხელისუფლების მიერ გატარებულ პოლიტიკას.
მან ბოკერიას ჰკითხა, ქართველი სპორტსმენების მიღწევები არის თუ არა ხელისუფლების დამსახურება, თუმცა, კითხვის დასმის დროს ოპოზიციონერი დეპუტატი სხდომათა დარბაზში არ იმყოფებოდა.
მას შემდეგ, რაც ბოკერია სხდომაზე დაბრუნდა, სიტყვით გამოსვლისთვის დრო ითხოვა და განაცხადა, რომ სპორტსმენების მიღწევა თავად მათი დამსახურებაა და არც მოქმედი და არც წინა ხელისუფლების დამსახურება არ არის.
უმრავლესობის დეპუტატმა მამუკა მდინარაძემ ბოკერიას მოუწოდა, კითხვის არსი სწორად გაეგო და პასუხი ისე გაეცა, რის შემდეგაც ერთმანეთს „ტუტუცი“ უწოდეს.
ბოკერიამ მდინარაძეს მიმართა: „თითი სხვისკენ გაიქნიე, უზრდელი, ტუტუცი ხარ“, რაზეც მდინარაძემ ბოკერიას მიმართა: „ტუტუცი ნაგავი ხარ, ადრე გეძველბიჭა“.
დეპუტატების დაპირისპირებაში საქართველოს პარლამენტის თავმჯდომარე არჩილ თალაკვაძე ჩაერთო. მან გიგა ბოკერიას მიმართა:
„გუშინ ქალბატონ ქაცარავას დაემუქრეთ განადგურებით, დღეს მამუკა მდინარაძეს ლამის პერსონალურ შეურაცხყოფას აყენებთ. პროცედურული კითხვა გქონდათ და მიიღეთ პასუხი. თქვენ დააგვიანეთ. გექნებათ განცხადების დრო და იქ მოვისმენთ თქვენს პასუხებს“, – განაცხადა არჩილ თალაკვაძემ ოპოზიციონერი დეპუტატის მისამართით.