მილანში, „ლა სკალას“ საოპერო თეატრში ფიფა-ს 2018-2019 წლების სეზონის ლაურეატთა დაჯილდოების ცერემონია გაიმართა. ფეხბურთის საერთაშორისო ფედერაციის პრიზს The Best ჰქვია. მთავარ ნომინაციაში – „წლის საუკეთესო მამაკაცი ფეხბურთელი“ არგენტინელმა ლიონელ მესიმ გაიმარჯვა. ის ფიფა-ს ვერსიით მეექვსედ გახდა წლის ფეხბურთელი.
მესიმ ხმების 46 პროცენტი მიიღო, მეორე ადგილზე გასულ ჰოლანდიელს ვირჯილ ვან დეიკს 38 პროცენტი ჰქონდა. მესამე იყო პორტუგალიელი კრიშტიანო რონალდო – 36 პროცენტით.
შეგახსენებთ, რომ საუკეთესო ფეხბურთელს ირჩევენ ფიფა-ს წევრი ქვეყნების ნაკრებთა კაპიტნები და მწვრთნელები, აგრეთვე ჟურნალისტები და გულშემატკივრები. ტრადიციულ ნომინაციებში გამარჯვებულთა სრული სია ასე გამოიყურება:
საუკეთესო მამაკაცი ფეხბურთელი – ლიონელ მესი (არგენტინა),
საუკეთესო ქალი ფეხბურთელი – მეგან რაპინო (აშშ),
საუკეთესო მამაკაცი მწვრთნელი – იურგენ კლოპი (გერმანია),
საუკეთესო ქალი მწვრთნელი – ჯილ ელისი (აშშ),
საუკეთესო მამაკაცი მეკარე – ალისონი (ბრაზილია),
საუკეთესო ქალი მეკარე – სარი ვან ვეენენდაალი (ჰოლანდია),
წლის საუკეთესო გოლი – დანიელ ჟორი (უნგრეთი),
ფანების პრიზი – სილვია გრეკო, ფეარ პლეის პრიზი – მარსელო ბიელსა.
სიმბოლური ნაკრები (მამაკაცები): ალისონი, მატეის დე ლიგტი, მარსელო, სერხიო რამოსი, ვირჯილ ვან დეიკი ფრენკი დე იონგი, ედენ აზარი, ლუკა მოდრიჩი, რიშტიანო რონალდო, კილიან მბაპე, ლიონელ მესი. სიმბოლური ნაკრები (ქალები): სარი ვან ვეენენდაალი, ლუსი ბრონზი, ნილა ფიშერი, კელეი ო’ჰარა, ვენდი რენარი, ჟული ერტცი, ამანდინ ჰენრი, როუზ ლაველი, მარტა, ალექს მორგანი, მეგან რაპინო.
