უკრაინის პრეზიდენტმა ვოლოდიმირ ზელენსკიმ გაეროს გენერალური ასამბლეის 74-ე სესიაზე სიტყვით გამოსვლისას დონბასის რეგიონში მიმდინარე ომის დროს დაღუპული ოპერის მომღერალ ვასილ სლიპაკის ისტორია გაიხსენა და ასამბლეის მონაწილეებს ის ტყვია აჩვენა, რომლითაც მომღერალი იქნა მოკლული:
“12,7 მილიმეტრი. ეს უბრალოდ კალიბრი არაა, რომელმაც მისი კარიერა შეაჩერა. ამან შეაჩერა მისი სიცოცხლეც. სხვათა შორის, ამ ტყვიის ღირებულება 10 დოლარია და სამწუხაროდ, ჩვენს პლანეტაზე ეს არის ადამიანის სიცოცხლის ფასიც. ასეთი ისტორიები ათასობითაა, ასეთი ტყვიები მილიონობით,” – განაცხადა ზელენსკიმ და აღნიშნა, რომ სლიპაკი მსოფლიოს საუკეთესო ბარიტონთა რიგებში შედიოდა.
უკრაინის ლიდერმა სესიის მონაწილეებს შეახსენა იმ 13 000 დაღუპულის შესახებ, რომლებიც დონბასში მიმდინარე ომმა იმსხვერპლა. მისი თქმით, შეცდომა იქნება იმის ფიქრი, რომ უკრაინაში მიმდინარე ომი ევროპას არ შეეხება.