ჩემზე ზეწოლა შეუძლია მხოლოდ ჩემს ვაჟს, რომელიც ექვსი წლის არის, – ასე გამოეხმაურა უკრაინის პრეზიდენტი ვლადიმირ ზელენსკი ჟურნალისტის შეკითხვას ზეწოლასთან დაკავშირებით, რომელიც აშშ-ის პრეზიდენტმა მასზე თითქოს სატელეფონო საუბრის დროს განახორციელა.
ვლადიმირ ზელენსკის თქმით, მასზე ზეწოლის განხორციელებას ვერავინ შეძლებს, რადგან ის დამოუკიდებელი უკრაინის პრეზიდენტია.
„ჩემზე ზეწოლას ვერავინ მოახდენს, იმიტომ რომ მე დამოუკიდებელი სახელმწიფოს პრეზიდენტი ვარ. ჩემზე ზეწოლის მოხდენა მხოლოდ ერთ ადამიანს შეუძლია – ჩემს 6 წლის შვილს“, – თქვა ზელენსკიმ.
სატელეფონო საუბარს, რომლის დროსაც თითქოს დონალდ ტრამპმა ვლადიმირ ზელენსკის პრეზიდენტობის კანდიდატის, ჯო ბაიდენისა და მისი ვაჟის წინააღმდეგ გამოძიების დაწყება მოსთხოვა, დემოკრატიული პარტია პრეზიდენტისთვის იმპიჩმენტის პროცესის დასაწყებად საკმარის მიზეზად მიიჩნევს.