არ შეიძლება, რომ საქართველომ არ სცადოს დიალოგის და დიპლომატიის გზა – ჩვენ მარტო, ერთი ერთზე არ ვართ და არასდროს ვიქნებით, – ამის შესახებ საქართველოს პრეზიდენტმა, სალომე ზურაბიშვილმა გაერო-ში ვიზიტის შეჯამებისას ქართველ ჟურნალისტებს განუცხადა, როდესაც რუსეთის საგარეო მინისტრის, სერგეი ლავროვისა და საქართველოს საგარეო მინისტრის, დავით ზალკალიანის შეხვედრას გამოეხმაურა.
„თუ ჩემი სიტყვა მოისმინეთ, იქ არის ძალიან ნათლად ნათქვამი, რომ ქვეყანას, რომელსაც აქვს ამ ტიპის კონფლიქტი და ოკუპირებული ტერიტორიების საკითხი თავის ტერიტორიაზე, აქვს ორი გზა. ერთია ომის და სამხედრო გზა, რომელზეც ჩვენ უარი ვთქვით, მეორე არის დიალოგისა და დიპლომატიის გზა. არ შეიძლება, რომ საქართველომ არ სცადოს ეს გზა და იყოს ჩაკეტილი თავის თავში. ძალიან ნიშანდობლივია, რომ ამ შეხვედრის შემდეგ რეაქციები, ყველა გამოხმაურება, რაც მოვისმინეთ, იქნება ეს ამერიკიდან, სახელმწიფო დეპარტამენტისგან თუ ასევე ევროკავშირის, მოგერინის უწყებიდან, ან კიდევ გენერალური მდივნისგან, ყველა გამოხმაურება, იყო დადებითი, იყო პოზიტიური, რომ თქვენ უნდა სცადოთ, ჩვენც თქვენთან ვართო. ჩვენ მარტო ერთი ერთზე არ ვართ და არასდროს ვიქნებით, ჩვენ ვართ ჩვენი პარტნიორების მხარდაჭერით, მაგრამ ის, რომ გავჩერდეთ და იზოლაციაში და გაჩერებულ მდგომარეობაში ვიყოთ, ალბათ სწორი არ არის“, – განაცხადა ზურაბიშვილმა.
ის ასევე გამოეხმაურა ლავროვის განცხადებას, რომლის თანახმადაც შეუძლებელია, რუსეთს არ აშფოთებდეს საქართველოს პოლიტიკური ელიტის ზოგიერთი რადიკალურად განწყობილი წარმომადგენლის მიერ რუსოფობიური განწყობილებების გაღვივების მცდელობა.
„ამაზე გეტყვით ერთ რამეს, რომ რუსოფობიული განწყობები არ არსებობს საქართველოში და არასდროს არ არსებობდა. ეს აქ ერთ-ერთი ჩემი თემა იყო. ყველგან, სადაც გამოვდივარ, რომ მსოფლიოს ვუთხრათ, ეს ჩვენი შემწყნარებლობა და ტოლერანტობაა. სხვათა შორის, ამის მაგალითია, რომ 1 500 000 რუსი ტურისტი შარშან ჩამოვიდა და არც ერთი ინციდენტი არ არსებობს. დანარჩენი არის პოლიტიკური დაძაბულობა, რომელიც აშკარად არსებობს ორ ქვეყანას შორის და როგორ იქნება სხვანაირად, როცა შენი ტერიტორია ოკუპირებულია? ამაზე უნდა მუშაობა“, – აღნიშნა საქართველოს პრეზიდენტმა.