ვარკეთილის მესამე მიკრორაიონის 322-ე კორპუსის სადარბაზოში დილიდან გამაგრებითი სამუშაოები მიმდინარეობს. ავარიული კორპუსის მე-8 სადარბაზოდან, საიდანაც გუშინ მოსახლეობის ევაკუაცია განხორციელდა, ადგილობრივებს ბინებიდან საკუთარი ნივთები გამოაქვთ.
საგანგებო სიტუაციების მართვის სამსახურის ინფორმაციით, საინჟინრო ჯგუფმა კორპუსში სამუშაოების პირველი ეტაპი დაასრულა, რის შემდეგაც მოქალაქეებს პირადი ნივთების გამოტანის საშუალება მიეცათ.
მეხანძრე-მაშველები უსაფრთხოების ნორმების დაცვის მიზნით მოქალაქეებს კორპუსში აცილებენ და ნივთების გამოტანაში ეხმარებიან. პერიმეტრზე უსაფრთხოებას საპატრულო პოლიციის თანამშრომლები იცავენ.
სადარბაზოში, რომლიდანაც გუშინ 18 ოჯახი გამოიყვანეს, დღეს სპეციალისტებმა რამდენიმე სართულის კიბეები გაამაგრეს.
კომენტარები