საზოგადოებრივი მოძრაობა „ლელოს“ წევრები და სოფელ გუგუტიანთკარის მცხოვრები ლევან რაზმაძის ოჯახი მამუკა ხაზარაძის მიერ გადაცემული კოტეჯის ადგილმდებარეობაზე ვერ თანხმდებიან.
„ლელოს“ წარმომადგენლები ითხოვენ, რომ კოტეჯი სოფელ გუგუტიანთკარში განთავსდეს. ლევან რაზმაძე კი აცხადებს, რომ ეს ფიზიკურად შეუძლებელია, ვინაიდან გუგუტიანთკარში კოტეჯის ჩადგმის შემთხვევაში ისინი დაცულები ვერ იქნებიან.
რაზმაძის ოჯახი „ლელოს“ მიმართავს ალტერნატიულ წინადადებებით, რომლის მიხედვითაც კოტეჯი გორში, წმინდაწყლის დასახლებაში, მათ ამჟამინდელ საცხოვრებელ მისამართზე განთავსდეს. თუმცა ეს წინადადება „ლელოს“ წარმომადგენლებისთვის მიუღებელია.
„მერიაში მითხრეს, რომ გუგუტიანთკარში ჩემთვის ადგილი არის გამოყოფილი, თუმცა ის ადგილი არ მომწონს. საცხოვრებლად არ გამოდგება, ე.წ. პოსტის მახლობლად არის და არაა უსაფრთხო. თუ მჩუქნის და მაძლევს, ცოტა ისეთ ადგილზე მინდა დავდგა, რომ მივიდე და მშვიდად ვიცხოვრო“, – აცხადებს ლევან რაზმაძე, რომლის სახლიც მცოცავი ოკუპაციის შედეგად უკუპანტების მიერ კონტროლირებად ტერიტორიაზე აღმოჩნდა.
ოკუპანტებმა გუგუტიანთკართან მავთულხლართების მონტაჟი 14 აგვისტოს განაახლეს.
16 აგვისტოს საზოგადოებრივი მოძრაობა „ლელოს“ დამფუძნებელმა მამუკა ხაზარაძემ განაცხადა, რომ გუგუტიანთკარში მცოცავი ოკუპაციის შედეგად სახლის გარეშე დარჩენილი გივი რაზმაძის ოჯახს ერთ თვეში ახალი სახლი ექნება.