ხულოში სახლს ცეცხლი გაუჩნდა

ხულოს მუნიციპალიტეტში, ხორჯოს თემის სოფელ ვანაძეებში ერთ-ერთ საცხოვრებელ სახლს ცეცხლი გაუჩნდა და სრულად დაიწვა. დამწვარია სახლის გვერდით არსებული დამხმარე შენობა-ნაგებობაც. ცეცხლი გადავიდა გვერდით არსებულ სახლზეც, თუმცა მეხანძრე-მაშველებმა ხანძრის ლოკალიზება შეძლეს და აღნიშნული სახლი ნაწილობრივ დაზიანდა. შემთხვევის შედეგად არავინ დაშავებულა.
ადგილზე მობილიზებულია ორი სახანძრო-სამაშველო ბრიგადა, მათ შორის მუნიციპალიტეტის მერიის საკუთრებაში მყოფი მანქანა. ადგილზე იმყოფება ხულოს მერი ვახტანგ ბერიძეც,რომელიც ამ დროისთვის, არსებულ ვითარებას პირადად ეცნობა.
როგორც “რეგიონულ კვირას” შს სამინისტროში განუცხადეს, პოლიციამ მომხდარ ფაქტზე, გამოძიება საქართველოს სსკ-ს 188-ე მუხლის მე-2 ნაწილით დაიწყო, რაც ცეცხლის წაკიდებით ნივთის დაზიანებას ან განადგურებას გულისხმობს.