პოლიტიკური პარტია „გირჩის“ ლიდერმა ზურაბ ჯაფარიძემ განაცხადა, რომ „შმაქსის“ დაჯარიმებული მძღოლებისთვის საჯარიმო თანხას „გირჩის“ პორტალზე დარეგისტრირებულმა 2000-ზე მეტმა ადამიანმა აუგროვა. ამის შესახებ ჯაფარიძემ გადაცემა “კვირის თემაში” სტუმრობის დროს განაცხადა.
“მე არ ვუხდი, ამ ადამიანებს ეხმარებიან „გირჩის“ წევრები და პარტნიორები, რომლებიც აფინანსებენ ზოგადად „გირჩს“ აფინანსებენ”, – განაცხადა ზურაბ ჯაფარიძემ.
ამასთან, ჯაფარიძის თქმით, „შმაქსის“ მძღოლები პატრულის თანამშრომლებმა დააშინეს და რის შემდეგაც დააჯარიმეს, რეალურად კი როგორც ჯაფარიძე ამბობს პატრულს „შმაქსის“ მძღოლების დაჯარიმების ბერკეტი არ აქვს:
„ჩვენ არ ვარღვევთ არცერთ კანონს და არ არსებობს კანონის ნორმა, რომლითაც შეიძლება პატრულმა იხელმძღვანელოს და დააჯარიმოს რომელიმე „შმაქსისტი“. რაც მათ შეძლეს უბრალოდ იყო ის, რომ დააშინეს ადამიანები და რომ დააშინეს ამის შემდეგ მათ [შმაქსისტებს] ისეთი რაღაცეები ათქმევინეს, რაც „წამოიკიდეს“ და ამის შემდეგ დააჯარიმეს. თორემ ვერცერთ „შმაქსისტს“, რომელიც იცავს იმ ინსტრუქციას რომელსაც ჩვენ მათ ვაძლევთ, პატრული ვერ აჯარიმებს“, – განაცხადა ზურაბ ჯაფარიძემ.
ჯაფარიძის თქმით, დედაქალაქში დაახლოებით 100-მდე „შმაქსი“ გადაადგილდება უკვე. ზურაბ ჯაფარიძის განცხადებით, ტაქსებთან დაკავშირებით გატარებულ ღონისძიებებს „რეფორმა არ შეიძლება ეწოდოს“.
„როგორ შეიძლება რეფორმა დაარქვა მერიის რაღაც ნაბიჯს, რომელმაც ათობით ათასი ადამიანი უმუშევარი დატოვა და ფასები ისე გაიზარდა რომ მთელი თბილისი დედას აგინებს თბილისის მერიას უკვე რამდენიმე დღეა. არა, ეს რეფორმა არ არის“, – განაცხადა ზურაბ ჯაფარიძემ.