ქედის მუნიციპალიტეტში საზოგადოებრივი ცენტრი იუსტიციის მინისტრმა, თეა წულუკიანმა გახსნა. ,,საზოგადოებრივი ცენტრები მომხმარებელს მრავალფეროვან სერვისს, გამარტივებულ პროცედურებს, საინფორმაციო ტექნოლოგიების ხელმისაწვდომობას და თანამედროვე ინფრასტრუქტურას სთავაზობენ”, – აღნიშნა თეა წულუკიანმა.
ქედის საზოგადოებრივი ცენტრის გახსნის საზეიმო ღონისძიებას აჭარის მთავრობის თავმჯდომარე, თორნიკე რიჟვაძე და ქედისა და ხულოს მაჟორიტარი დეპუტატები, ასევე მოწვეული სტუმრები და ადგილობრივი მოსახლეობა ესწრებოდა.
იუსტიციის სამინისტროს საზოგადოებრივ ცენტრში ადგილობრივი მოსახლეობა 200-ზე მეტ სახელმწიფო და კერძო სექტორის სერვისს მიიღებს. ქედის საზოგადოებრივი ცენტრის მომსახურებით დაბის მოსახლეობასთან ერთად მუნიციპალიტეტის 64 სოფლის 20 000-ზე მეტი მოსახლე ისარგებლებს.
იუსტიციის მინისტრმა თეა წულუკიანმა დამსწრე საზოგადოებას გააცნო ინიციატივა, რომ ქედის ახალგახსნილი საზოგადოებრივი ცენტრის ბიბლიოთეკას მიენიჭოს ქართველი პოეტის − ფრიდონ ხალვაშის სახელი.
აღნიშნული საზოგადოებრივი ცენტრი აჭარის რეგიონში რიგით მეხუთეა. ქედის გარდა ცენტრები ფუნქციონირებს მუხაესტატეში, ჩაქვში, შუახევსა და ქობულეთში.
დაბა ქედა აჭარის ტურისტული მარშრუტების ნუსხაშია შეტანილი. ცენტრში არსებული სერვისებით სარგებლობა ადგილობრივ მოსახლეობასთან ერთად იქ ჩასულ სტუმრებსაც შეეძლებათ. ისინი 24-საათიანი უკაბელო უფასო ინტერნეტითა და სკაიპის ოთახით, ასევე საბანკო მომსახურებითაც ისარგებლებენ. მომხმარებელს ადგილიდან გაუსვლელად შეეძლება, მიიღოს პასპორტი და პირადობის მოწმობა, განახორციელოს მიწის, უძრავი ქონების რეგისტრაცია, მიიღოს საკუთრებასთან დაკავშირებული განაცხადი, დაარეგისტრიროს ქორწინება, სოციალურად დაუცველი ოჯახის ქულის მინიჭების სერვისი და სხვა. ამავე საზოგადოებრივ ცენტრში მოქალაქეებს პრობაციის ეროვნული სააგენტოს მომსახურებით სარგებლობაც შეეძლებათ.
ცენტრში, ასევე, ხელმისაწვდომი იქნება „მაგთისა“ და „ლიბერთი ბანკის“ მომსახურებაც, რაც პენსიონერებს – ადგილიდან გაუსვლელად პენსიის მიღების, ახალგაზრდებს კი უკაბელო ინტერნეტით უფასოდ სარგებლობის საშუალებას მისცემს.
საზოგადოებრივ ცენტრში ახალგაზრდებისთვის მოწყობილია უახლესი ტექნიკით აღჭურვილი ბიბლიოთეკა, სადაც ელექტრონულ წიგნებთან ერთად, ბეჭდური გამოცემებიცაა.
როგორც იუსტიციის მინისტრმა, თეა წულუკიანმა აღნიშნა, ხვალ ახალი საზოგადოებრივი ცენტრი ხულოშიც გაიხსნება, რითაც მთელ რეგიონში იუსტიციის ტერიტორიული სამსახურების საბჭოთა ინფრასტრუქტურა დასრულდება.