წუხელ, გვიან ღამით, გარდაცვლილი პაციენტის ახლობლები ზუგდიდის რეფერალური ჰოსპიტლის ექიმს ფიზიკურად გაუსწორდნენ. სასტიკად ნაცემი მედიკოსი, ზუგდიდის რეფერალურ საავადმყოფოშია მოთავსებული.
გავრცელებული ინფორმაციით, ქირურგმა დავით გერლიანმა ცოტა ხნის წინ ადგილობრივ ვ.ზ-ს ბარიატრიული (წონაში დაკლების) ოპერაცია ჩაუტარა, რის შემდეგ პაციენტი, ჯანმრთელობის მდგომარეობის სავარაუდო გართულების გამო თბილისის ერთ-ერთ კლინიკაში გადაიყვანეს, სადაც გარდაიცვალა.
პაციენტის გარდაცვალების ზუსტი მიზეზები უცნობია, თუმცა მისი ოჯახის წევრები და ახლობლები თვლიან, რომ გარდაცვალება ოპერაციის შემდგომმა გართულებებმა გამოიწვია, რაშიც ქირურგ დავით გერლიანს ადანაშაულებენ.
როგორც “რეგიონულ კვირას” შს სამინისტროში განუცხადეს, ეჭვმიტანილი პირი იდენტიფიცირებულია, ის გარდაცვლილი პაციენტის არასრულწლოვანი შვილია. მომხდარზე გამოძიება სსკ 126-ე მუხლით დაიწყო, რაც ძალადობას გულისხმობს.