ჭყონდიდისა და მარტვილის ყოფილმა მიტროპოლიტმა, პეტრე ცაავა გიორგი გახარიას დღევანდელ განცხადებას გამოეხმაურა.
მისი თქმით, ქვეყნის პირველი პირის შეფასება უფრო ღირსეული უნდა იყოს და მან უნდა დაამტკიცოს ვინ არიან ის გარე ძალები ვიზეც ის საუბრობდა.
“რაც შეეხება შეფასებას მოვლენების, ვიტყოდი, რომ უფრო ღირსეული უნდა იყოს ქვეყნის პირველი პირისა იმიტომ, რომ აშკარად ჩანს თეთრით შავზე, რომ ეკლესიაში არის პრობლემები და მსგავსი შეფასება, რომ ყველაფერი თითქოს გარე ძალებისაგან არის, ვალდებულია დაამტკიცოს ვინ არის ეს გარე ძალები. წინააღმდეგ შემთხვევაში ეს როგორც მინიმუმ არის ფარისევლობა. რა თქმა უნდა, მე მესმის მათი, პოლიტიკური განწყობისა, რომ 2020 წლის არჩევნები არის ჩასატარებელი მაგრამ, ამ მეთოდით ვფიქრობ ძალიან გაჭირდება არჩევნების ღირსეულად ჩატარება თუ ასეთი დამოკიდებულება გვექნება ერში თუ ბერში უსამართლობის მიმართ. მინდა დავამატო, რომ შერჩევითი სამართალი და უწმინდურება ვერანაირად ვერ იქნება სიმბოლოება ჩვენი სახელმწიფოებრივობისა, ეს არის მხოლოდ სიმბოლო პოსტსსაბჭოთა საქართველოსი” – აღნიშნა პეტრე ცაავამ.
კითხვაზე თუ რა პასუხი ექნებოდა მას ქვეყნის პირველი პირის ბრალდებაზე სახელმწიფო გადატრიალების მცდელობისთვის, ყოფილმა მეტროპოლიტმა განაცხადა, რომ “გიორგი გახარიას ღმერთმა შეუნდოს”.