ისეთი რაღაცები მოვისმინე, რომ შევძრწუნდი, – ასე გამოეხმაურა სექსუალურ ძალადობაში დადანაშაულებული მიტროპოლიტი, მეუფე ზოსიმე მის წინააღმდეგ გამოთქმულ კრიტიკას.
“ეს ყველაფერი არის აბსურდი, ტყუილი. შევძრწუნდი ისეთი რაღაცები მოვისმინე, ისინი მოქმედებენ რაღაც ძალების წაქეზებით. სხვა სულის ხალხი იყო, ამათ ეკლესიის მორჩილება კი არა ეკლესიის დამორჩილება სურდათ იმ ხალხს ვინც ამათ უკან იდგა. ამ ხალხის უკან ვინ იდგა ამას ვერ გეტყვით, საჯაროდ ვერ დავასახელებ, მაგრამ ყოფილი მღდელმთავარი ქრისტეფორე წამალაიძე ადრევე დაუპირისპირდა ეკლესიას. ადრევე დაპირისპირება მოხდა მაშინ, როდესაც ის წინააღმდეგობაში იყო და ესენი იმის ხალხია. თავიდანვე შევამჩიე ის უცხო სული და ამათ არეულობა, შფოთი და დაპირსიპირება უნდოდათ ეკლესიაში”, – განმარტა მეუფე ზოსიმემ.
შეგახსენებთ, 80-იან წლებში სასულიერო სემინარიის რექტორს, ამჟამად წილკნისა და დუშეთის მიტროპოლიტ ზოსიმე შიოშვილს, მამა გიორგი სხილაძე სექსუალურ შევიწროებაში ადანაშაულებს.
საფრანგეთში მოღვაწე და საქართველოში დროებით ჩამოსული სასულიერო პირი ამტკიცებს, რომ 1988 წელს, მისი სტუდენტობის დროს რექტორმა ერთ-ერთ სტუდენტზე, კახა კალაძეზე ძალადობა სცადა და ეს პირველი შემთხვევა არ იყო. სტუდენტმა მომხდარის შესახებ წერილი მაშინდელ მარგველ ეპისკოპოს ქრისტეფორე წამალაიძეს მისწერა, თუმცა უშედეგოდ. დაისაჯნენ მხოლოდ სტუდენტები – ისინი სასწავლებლიდან გარიცხეს. მამა გიორგი სხილაძე ამტკიცებს, რომ მეუფის ქმედებებზე ინფორმაცია ჰქონდა პატრიარქსაც. მომხდარის შემდეგ რექტორს თანამდებობა დაატოვებინეს, თუმცა მოგვიანებით ორჯერ დააწინაურეს.