მარტვილის და სალხინოს მონასტრების ყოფილი და კოჯრის წმ.გრიგოლ ფერაძის სახელობის მამათა მონასტრის ახლანდელი წინამძღვარი მამა ილია აცხადებს, რომ მეუფე პეტრესთან უთანხმოება 2012 წლის მოახლოებული არჩევნების გამო დაიწყო. მამა ილიამ და მასთან ერთად კიდევ 20-მდე ადამიანმა მეუფე პეტრეს ეპარქია 2012 წელს დატოვა. და ამ კონტექსტში მამა ილია ციხის კადრების საქმესაც ახსენებს. ამის შესახებ მან გადაცემაში “კვირის თემა” განაცხადა.
მამა ილიას თქმით, მაშინ როდესაც ციხის კადრები გავრცელდა, ის მეუფე პეტრესთან მივიდა, რადგან აინტერესებდა რას იტყოდა მეუფე ამის შესახებ.
“როცა ციხის კადრები გავრცელდა მივედი მეუფესთან და დავინტერესდი რას მეტყვის. და მან თქვა, რომ ვინც ამას აკეთებდა, ვინც ხალხს აწამებდა და აუპატიურებდა ისინი გმირები არიან. ამას ამბობდა, თითქოს სჯეროდა კიდეც ამის. ეს არის ადამიანი, რომელიც სიტუაციას ერგება. არ ვიცი მაშინდელ მოქმედ პარტიასთან რა ვალდებულებები გააჩნდა, უბრალოდ შევატყვე, რომ არ შეეძლო სხვანაირად ეპასუხა. მან თქვა, რომ ის, ვინც ეს კადრები გაავრცელა მოღალატეები არიან სამშობლოსი და ჩვენ [მღვდლები] ვცდებით“, – განაცხადა მამა ილიამ.
მამა ილიას თქმით, მეუფე პეტრე ხშირად აჟღერებდა ცილისმწამებლურ განცხადებებს მის წინააღმდეგაც, მაგალითად როგორც მამა ილია ამბობს, მეუფე პეტრე ცაავამ მას დაოჯახება და რელიგიის შეცვლა დააბრალა.
“ეპარქიიდან ჩვენი წამოსვლის დღიდან იწყება იქ ძალიან პრიმიტიული [განცხადებები] – გაიპარნენ, ავარიაში მოხვდნენ აქედან რახან წავიდნენ – ამით დაწყებული მივედით იქამდე, რომ მე თითქოს განვიმოსე, დავტოვე მღვდლობა და სასულიერო პირობა და შევირთე ცოლი. იმ მრევლისთვის, ვისთვისაც მე გზის მაჩვენებელი ვიყავი ეს მძიმე მოსასმენი იყო, იყვნენ ადამიანები რომლებსაც შეეძლოთ ეს გადაემოწმებინათ ჩემთან, იყვნენ ისეთი ადამიანები, რომლებსაც ერიდებოდათ გადამოწმება. შესაბამისად ეს ჭორი მუშაობდა.
შემდეგ, როცა საზღვარგარეთ წავედი სასწავლებლად, ერთ ადამიანს უთხრა, რომ მე კათოლიციზიმში გადავედი. ჩვენ ყველას პატივს ვცემთ, მაგრამ ეს მართლმადიდებელი მღვდლისთვის შეურაცხყოფაა”, – განაცხადა მამა ილიამ.
მისი თქმით, 2012 წლამდე მეუფე პეტრე ცაავა “შესაშური სულიერების მქონე, თავდადებული ადამიანი იყო”.
“მიტროპოლიტი პეტრე – ამ ადამიანს არ ვიცნობ ფაქტიურად, დღეს ვისაც ვხედავ და ვისაც ვხედავ 2012 წლის შემდეგ და ვისთან ერთადაც ვიღწოდი 2012 წლამდე იყო შესაშური სულიერების მქონე, თავდადებული ადამიანი. დადგა დღე, როცა მეუფე პეტრემ ამ ჩვენი საერთო გზიდან გადაუხვია, მან ჩათვალა რომ მე გადავუხვიე ამ გზიდან იმიტომ, რომ არ დავეთანხმე რაღაც საკითხებში – ეს იყო 20212 წლის მოახლოებული არჩევნები – ჩემი და მისი განსხვავებული პოზიცია მაშინდელ ციხეებში არსებულ ვითარებაზე“, – განაცხადა მამა ილიამ.