საქართველოს საგარეო საქმეთა მინისტრი 24-26 ნოემბერს ვიზიტით გერმანიის ფედერაციულ რესპუბლიკას ეწვევა.
Imedinews-ს საგარეო საქმეთა სამინისტროში განუცხადეს, რომ მინისტრი გერმანიის საგარეო საქმეთა მინისტრს ჰაიკო მაასს, გერმანიის ფედერალური კანცლერის მრჩევებთან საგარეო პოლიტიკის და უსაფრთხოების საკითხებში იან ჰეკერს, ასევე გერმანიის ბუნდესტაგის პრეზიდენტს, ვოლფგან შიობლეს და ბუნდესტაგის სხვა წევრებს შეხვდება.
ვიზიტის ფარგლებში დავით ზალკალიანი მონაწილეობას მიიღებს კიორბერის ფონდის – რიგით მეცხრე – ბერლინის საგარეო პოლიტიკის ფორუმში და გამართავს ორმხრივ შეხვედრებს გერმანიის აღმასრულებელი და საკანონმდებლო ხელისუფლების წარმომადგენლებთან.
ბერლინის საგარეო პოლიტიკის ფორუმი წარმოადგენს ევროპაში ერთ-ერთ მნიშვნელოვან პლატფორმას საგარეო და უსაფრთხოების პოლიტიკის აქტუალური საკითხების განხილვისათვის.
ფორუმის მუშაობაში მონაწილეობას მიიღებენ მაღალი რანგის პოლიტიკოსები, მთავრობების წარმომადგენლები, ექსპერტები და ჟურნალისტები, როგორც გერმანიიდან და ევროპის სხვა ქვეყნებიდან, ასევე ახლო აღმოსავლეთიდან, აზიიდან და შეერთებული შტატებიდან.
ღონისძიების მთავარი თემა გერმანიისა და ევროპის საგარეო პოლიტიკის თანამედროვე გამოწვევები იქნება. „მნიშვნელოვანია, რომ საპანელო დისკუსიაზე, რომელშიც ევროპელ კოლეგებთან ერთად მონაწილეობას მიიღებს დავით ზალკალიანი, იმსჯელებენ საქართველოში კონფლიქტების გადაწყვეტისა და ამ მიმართებით ევროკავშირის მხრიდან მხარდაჭერის უზრუნველყოფის შესაძლებლობებზე“, – აცხადებენ საგარეო უწყებაში.