ეკა ბესელია – რაც შეეხება პიკეტირებას, ეს კანონის ფარგლებშია

აუცილებელია ხელისუფლებამ უკან დაიხიოს,- ამის შესახებ დამოუკიდებელმა დეპუტატმა ეკა ბესელიამ “ლეიბორისტული პარტიის“ ოფისში განაცხადა, სადაც ოპოზიციური პარტიების ლიდერები სამოქმედო გეგმებზე მსჯელობენ. მისივე თქმით, ოპოზიციური პარტიების ლიდერების მიერ დაანონსებული პარლამენტის შენობის მშვიდობიანი გზით პიკეტირება, კანონის ფარგლებში მოხდება.
“ხვალინდელი აქცია უფრო მასშტაბური იქნება ამიტომ, ძალიან მნიშვნელოვანია ვაჩვენოთ, რომ აუცილებელია ხელისუფლებამ დაიხიოს უკან და ეს გაუგონარი სიჯიუტე, რომელიც ქვეყნის შიგნით და ქვეყნის გარეთ ძალიან მძიმე პოლიტიკურ კრიზისს ქმნის, შეცვალოს და მოძებნოს გზა პრობლემის გადალახვის, რომელიც არსებობს და ამას ჩვენ ვთავაზობთ. რაც შეეხება პიკეტირებას, ეს კანონის ფარგლებშია, აქ არაფერია უკანონო”,– განმარტა ბესელიამ.
ოპოზიციის და სამოქალაქო საზოგადოების წარმომადგენლები პარლამენტთან შეკრებას, ხვალ 19:00 საათზე გეგმავენ.
შეგახსენებთ, რომ ოპოზიცია და სამოქალაქო საზოგადოება პარლამენტის მიერ საარჩევნო ცვლილებასთან დაკავშირებული კანონპროექტის ჩაგდებას აპროტესტებს, რომელიც პროპორციულ სისტემაზე გადასვლას ითვალისწინებდა.