“ისლამური სახელმწიფოს” ფრანგულენოვანმა ონლაინ-ჟურნალმა პანკისელი მებრძოლის, თარხან ბათირაშვილის (უმარ ალ-შიშანის) ანდერძი გამოაქვეყნა.
სპეციალისტთა უმრავლესობა მის ავთენტურობაში დარწმუნებული არ არის, თუმცა აცხადებენ, რომ თუკი ეს ტექსტი, სადაც კავკასიაცაა ნახსენები, მართლაც ბათირაშვილმა დაწერა, საქართველოსთვის რაიმე საფრთხეს არ შეიცავს. ” ისლამური სახელმწიფოს” ფრანგულენოვანი ონლაინ ჟურნალის “დარ ალ ისლამის” მიერ გამოქვეყნებლი ანდერძის მიხედვით, თარხან ბათირაშვილი რამდენიმე რეკომენდაციას იძლევა და იმედოვნებს, რომ ისინი შეძლებისდაგვარად განხორციელდება”, – წერს გაზეთი “რეზონანსი” სტატიაში, სათაურით რატომ ახსენა თარხან ბათირაშვილმა თავის ანდერძში კავკასია.
“ჩემი უკანასკნელი რეკომენდაციები, რომლებიც, იმედია, განხორციელებული იქნება, რამდენადაც შესაძლებელია. პირველი რეკომენდაცია: მივმართავ ყველა მოჯაჰედს, რომლებიც ჩემს განკარგულებაში იყვნენ. გთხოვთ, მაპატიოთ, თუ გაწყენინეთ. რაც შემეხება მე, მე თქვენ გაპატიეთ. გირჩევთ, ალაჰს პატიება თხოვოთ და განაახლოთ თქვენი მონანიება. მეორე რეკომენდაცია: არასოდეს დაანებოთ თავი ჯიჰადს და ჰიჯრას, ვინაიდან ამ ორ რამეში არის ჩვენი სულების გადარჩენა და ჩვენი რელიგიის გამარჯვება. მესამე რეკომენდაცია: განსაკუთრებით მივმართავ ემირებს. მათ ვეუბნები: სანდო პირებისა და ახლო წრის შერჩევისას ყურადრება მიაქციეთ არა მათ წარმომავლობას, არამედ მათ შიშს ალაჰის წინაშე და მათ მიერ მოვალეობების შესრულების უნარებს. მეოთხე რეკომენდაცია: უარყავით ამქვეყნიეური საზიზღარი ცხოვრება და გახსოვდეთ, განიკითხებით ყველა იმ ქონების გამო, რაც თქვენს ხელში იყო. არ დაკარგოთ დრო ამქვეყნიური ქონების მოპოვების მისწრაფებაში. მეხუთე რეკომენდაცია: ო, მორწმუნეების ემირო, ალაჰმა დაგიფაროს – ალაჰის სახელს ვახსენებ, რათა დაგლოცოს და რათა შეძლო შენს ირგვლივ შეკრიბო დაჩაგრული, დამშეული, მიმოფანტული მორწმუნეები. რათა ალაჰმა შეგაძლებინოს ორი წმინდა ადგილის, ქვეყნის დაპყრობა, ისევე, როგორც იერუსალიმის დაპყრობა. და ბოლოს, მოწრმუნეების ემირო, გთხოვ, არ დაივიწყო კავკასია”, – ნათქვამია ანდერძში”, – აღნიშნავს გამოცემა.
“პირველი კითხვა, რაც წერილთან დაკავშირებით გაჩნდა, ის იყო, თუ რამდენად სანდოა იგი და ნამდვილად ბათირაშვილის დაწერილია თუ არა. კავკასიოლოგი, კონფლიქტოლოგი მამუკა არეშიძე ამბობს, რომ ამაში დარწმუნებულები, რა თქმა უნდა, ვერ ვიქნებით, რადგან არავინ იცის, რეალურად ვინ დაწერა ეს ტექსტი. თუმცა, აქვე იმასაც დასძენს, რომ პანკისელებს, ვინც ბათირაშვილს პირადად იცნობდა, ამაში ეჭვი არ ეპარებათ. ზოგადად, მისი თქმით, მიუხედავად იმისა, რომ ისლამისტ ლიდერებს შორის ამგვარი ანდერძების დატოვების ტრადიციაც არსებობს, იმაშიც ვერ ვიქნებით დარწმუნებული, რომ წერილი ნამდვილად ანდერძად იყო ჩაფიქრებული. არეშიძე არ გამორიცხავს, რომ შეიძლება ეს უბრალოდ ბათირაშვილის გზავნილი იყო თანამებრძოლებისთვის. გამოქვეყნებულ ტექსტში განსაკუთრებით იქცევს ყურადღებას ბოლო წინადადადება. საზოგადოების ნაწილმა კავკასიის არდავიწყებისკენ მოწოდება ღია მუქარად აღიქვა და მიიჩნია, რომ ბათირაშვილმა “ისლამურ სახელმწიფოს” რეგიონში გააქტიურებისკენ მოუწოდა. ამ მოსაზრებას მამუკა არეშიძე არ ეთანხმება და ამბობს, რომ ამგვარი შიშის საფუძველი არ არსებობს. “ბოლო პუნქტის გარდა მთელ ტექსტში საუბარი იმაზეა, რაც ისლამისტების ცხოვრების წესია ჯიჰადი, ჰიჯრა. რწმენის განმტკიცება და სარწმუნოებისთვის ბრძოლა ამ ორგანიზაციის წევრებისთვის ისედაც აუცილებელია. ასე რომ, მთელ ტექსტში განსაკუთრებული არაფერია. რაც შეეხება მეექვსე პუნქტს, შეიძლება ითქვას, რომ ეს მისი დამოკიდებულებაა რეგიონის მიმართ. შეიძლება ცოტა ხმამაღალი ნათქვამი გამომივიდეს, მაგრამ მას უყვარდა კავკასია და თავისი ქვეყანა – საქართველო. თავისებური და ძალიან საინტერესო დამოკიდებულება ჰქონდა. ამაზე პირადად მასთან არ მისაუბრია, მაგრამ მისი ყოფილი თანამებრძოლები ქართული არმიიდან ამას ყოველთვის ხაზს უსვამდნენ. მიუხედავად იმისა, რომ ბოლო მოწოდება ბრძანების კილოთია დაწერილი, ეს ალბათ, უბრალოდ, მიმართვაა და სხვა არაფერი“, – აცხადებს მამუკა არეშიძე, რომლის თქმით, ეს განსაკუთრებულ ხიფათს არ შეიცავს,” – განაგრძობს გამოცემა.
“ჩვეულებრივი ტექსტური ფორმაა და ამაში განსაკუთრებულს ვერაფერს ვხედავ. მაჰმადიანების მიერ შედგენილ წერილებში ბოლოში ასეთი მიმართვა ხშირადაა. ასე რომ, ეს ნაწილი მაინცდამიანც საფრთხის შემცველად არ უნდა აღვიქვათ,” – აცხადებს არეშიძე. პანკისის უხუცესთა საბჭოს ხელმძღვანელი ხასან ხანგოშვილი წერილის ავთენტურობას ეჭვქვეშ აყენებს. თუმცა, მისი აზრით, თუკი ეს ტექსტი მართლაც ბათირაშვილის დაწერილია, იგი შესაძლოა ჩრდილო კავკასიას, ან კონკრეტულად ჩეჩნეთს გულისხმოდა – რათა მათ არ დაივიწყონ, თუ რა მოხდა იქ და შურისძიებისთვის ყოველთვის მზად იყვნენ. ასე რომ, მისი აზრით, ამ ნათქვამში საშიში არაფერია.” გამორიცხულია მას კავკასიაში “ისლამური სახელმწიფოს” გააქტიურება და მითუმეტეს ტერაქტები ეგულისხმა. ასეთი მოწოდება ბათირაშვილის ან სხვა კავკასიელი მებრძოლების მხრიდან არასოდეს ყოფილა, იმ აჭარლების გამოხტომას თუ არ ჩავთვლით. ბათირაშვილი ასეთ რამეს არც ერთ შემთხვევაში არ იგულისხმებდა. მის წერილს სიღრმისეულად თუ გავაანალიზებთ, მას ახალი არაფერი უთქვამს, რაც ჯიჰადში ისედაც დევს. ყურანში განმარტებულია, რომ მთავარი ჯიჰადი სულიერი განწმენდა და საკუთარ თავთან ბრძოლაა. მისი მოწოდებები ამასაც გულისხმობს, რაც ისედაც ცხადია”, – განაცხადა ხასან ხანგოშვილმა გამოცემასთან სუბრისას და დასძინა, რომ მის წერილში რადიკალურური და შემაშფოთებელი არაფერია“, – წერს სტატიის ავტორი.
“შეგახსენებთ, რომ დაჯგუფება “ისლამური სახელმწიფოს” ერთ-ერთი ლიდერის თარხან ბათირაშვილის (უმარ ალ-შიშანი) დაღუპვის შესახებ ინფორმაცია არაერთხელ გავრცელდა, თუმცა საბოლოოდ, ეს ფაქტი მიმდინარე წლის ივლისში დადასტურდა. თარხან ბათირაშვილი საქართველოს მოქალაქე იყო. ის “ისლამური სახელმწიფოს” ერთ-ერთ ყველაზე გავლენიან ფიგურას წარნოადგენდა. ბათირაშვილი ე.წ. ომის მინისტრის პოსტს იკავებდა”, – დასძენს გამოცემა.