ხორავას ქუჩის საქმეზე ერთ-ერთი ბრალდებულის მიხეილ კალანდიას ადვოკატი, ზურაბ თოდუა „პრაიმტაიმთან“ აცხადებს, რომ მან სარალიძის წინააღმდეგ პროკურატურას საჩივრით გუშინ მიმართა, რადგან ის სარალიძის გამონათქვამებს მისი მისამართით მუქარად აღიქვამს და პროკურატურას რეაგირებისკენ მოუწოდებს.
„გუშინ შევიტანე ზაზა სარალიძის წინააღმდეგ საჩივარი, რადგან მე მის მუქარას მივიჩნევ რეალურად „ჭკვიანად უნდა ვიყო“ თურმე. სარალიძე ავრცელებს ინფორმაციას, რომ ვიღაც-ვიღაცები, სავარაუდოდ, კალანდიების ოჯახი და მე ზემოქმედებას ვახდენთ მოწმეებზე. ეს ყველაფერი სისხლის სამართლის დანაშაულია.
სარალიძის მუქარაზე თუ სახელმწიფო თავის ფუნქციას ვერ შეასრულებს, პოლიციელს ჯოხით დასდევს და ამას პატიობენ, მე არავის არაფერს ვაპატიებ. ქუჩაში ვერ გამოვალ და მუშტების ქნევასაც არ ვაპირებ. მოვითხოვ, ყველამ თავისი ფუნქცია შეასრულოს, პროკურორმა თავისი, ადვოკატმა თავისი, მობრძანდეს ზაზა სარალიძე პროცესზე და მოისმინოს მოწმეები რას და როგორ ტონალობაში საუბრობენ მომხდარზე.
– ზაზა სარალიძის ადვოკატი აცხადებს, რომ კონტექსტიდან ამოვარდნილი ფრაზები შეკრიბეთ და წარუდგინეთ პროკურატურას…
– ხუთ ნომერში გამოქვეყნებულ სტატიებს რა თქმა უნდა, ვერ წარვადგენდი, მაგრამ სწორედ ამავე სტატიებიდან ამონარიდები ამოვიღე. სარალიძე სოციალურ ქსელში ზურა ბიძიას მეძახის, ცოტა ირონიაც აწუხებს ალბათ…
მის მდგომარეობას ბევრ რამეში ვიზიარებ, გაუბედურებული ადამიანია. არ მინდა ჩავყვე, მაგრამ წითელ ხაზებს არ უნდა კვეთდეს.
– მიხეილ კალანდიას განაჩენზე რა მოლოდინები გაქვთ?
– რაც შეეხება მიხეილ კალანდიას, ის უდანაშაულოა და მისი გამამართლებელი განაჩენი უნდა დადგეს. ის ორი პოლიტიკური პარტიის „ქართული ოცნებისა“ და „ევროპული საქართველოს“ პროექტია. ორივეს აწყობდა მიხეილ კალანდია მსხვერპლად შეეწირა, ოღონდ ბუნტი არ ყოფილიყო“,- აცხადებს ზურაბ თოდუა.
„პრაიმტაიმი“ ზაზა სარალიძის ადვოკატს დაუკავშირდა. როგორც ნესტან ლონდარიძე აცხადებს, მათ თავად მიმართეს კრიმინალურ პოლიციას, რადგან სწორედ ეს უწყება იძიებს მომხდარის ძირითად ნაწილს და თავიანთი სურვილით ზაზა სარალიძემ მისცა ჩვენება.