ემიგრანტები ჯერ კიდევ არ აღიქვამენ საელჩო საკონსულოებს როგორც საკუთარ სახლს, ეკლესიის გარშემო უფრო იკრიბებიან ვიდრე საელჩოსა და მისი აქტივობების ირგვლივ. ეს ნიშნავს, რომ უნდა გაძლიერდეს კავშირები თქვენსა და მათ შორის, ისევე როგორც მათსა და ქვეყანას შორის, – ამის შესახებ საქართველოს პრეზიდენტმა, სალომე ზურაბიშვილმა „ელჩების კონფერენციის“ მონაწილე ქართველი დიპლომატებისადმი სიტყვით მიმართვისას განაცხადა.
„მინდა თქვენი ყურადღება გავამახვილო დიასპორის საკითხზე. ერთის მხრივ დიასპორა ჩვენი დიდი ტკივილია, ემიგრაციის ნაკადი ცლის ქვეყანას და რეგიონებს თავის ახალგაზრდობისა და აქტიური მოსახლეობისგან, ამით ასუსტებს სახელმწიფოს მის ეკონომიკას. ამავე დროს, დიასპორა იმედიცაა, უცხოეთში ვიძენთ ახალ ძალებს, ყველა ქვეყანაში, ყველა დარგში წარმატებულ ადამიანებს, რომლებიც ხვალ უფრო ეფექტიანად ჩაერთვებიან ქვეყნის პოპულარიზაციაში იქ, და მის მშენებლობაში აქ, ეს კი თქვენზეა დამოკიდებული. ემიგრანტები ჯერ კიდევ არ აღიქვამენ საელჩო საკონსულოებს, როგორც საკუთარ სახლს. ეკლესიის გარშემო უფრო იკრიბებიან ვიდრე საელჩოსა და მისი აქტივობების ირგვლივ. ეს ნიშნავს, რომ უნდა გაძლიერდეს კავშირები თქვენსა და მათ შორის ისევე, როგორც მათსა და ქვეყანას შორის. მოქალაქეობის აღდგენის ცნობები ისე არ ვრცელდება, როგორც საჭიროა. საარჩევნო სიებში რეგისტრაცია ჯერ კიდევ ძალიან არასრულყოფილია დიასპორის არჩევნებში მონაწილეობა უნდა გაძლიერდეს. ხმის მიცემა და საკუთარი წარმომადგენლის არჩევა არის მათი როგორც ჩვენი უფლება“, – განაცხადა სალომე ზურაბიშვილმა.
საქართველოს პრეზიდენტის თქმით, პრეზიდენტის ინსტიტუტი უნდა დარჩეს პოლიტიკური, ტოტალიტარული ომის გარეთ, რათა ეს ინსტიტუტი და მასთან ერთად სახელმწიფო არ გახდეს სამიზნე.
„კიდევ ერთხელ უნდა შევეხო ურთულეს საკითხს, ვხედავთ პოლარიზაცია როგორ ხლეჩს საზოგადოებას და რაოდენ ასუსტებს სახელმწიფოს. ვცდილობ არ შევიდე ამ დაპირისპირებაში, რამეთუ პრეზიდენტის ინსტიტუტი უნდა დარჩეს ამ პოლიტიკური ტოტალიტარული ომის გარეთ, რათა ეს ინსტიტუტი არ გახდეს სამიზნე და მათთან ერთად სახელმწიფო. სამწუხაროდ, ეს პოლარიზაცია საელჩოებზე და ჩვენს ემიგრაციაზეც გავრცელდა და ამით ერთად ვაყენებთ ზიანს ჩვენს ქვეყანას და სახელმწიფოს. როგორც მინიმუმ, ის საკითხები რომლებიც ყველასთვის პრიორიტეტს წარმოადგენს: ქვეყნის ერთიანობა, ევროატლანტიკური მისწრაფება, კულტურისა და ქვეყნის პოპულარიზაცია „დაცულ ტერიტორიებად“ უნდა გამოვაცხადოთ და ამ მიმართლებებით , მაინც ვიმუშაოთ ერთად. მინდა გამოვთქვა იმედი, რომ ამ საარჩევნო წელს შიდა ვნებათა ღელვის მიუხედავად საელჩოები შეძლებენ შეინარჩუნონ ჩვენს ემიგრაციაში სიმშვიდე და ერთიანობა, რათა ქვეყნის გარეთ ერთად ვიმუშაოთ მთავარი მიზნების მისაღწევად,“ – აღნიშნა სალომე ზურაბიშვილმა.