უკრაინული „დემოკრატიული ინიციატივის ფონდის“ მიერ ჩატარებული გამოკითხვის თანახმად, უკრაინელების 55% სურს, რომ ქვეყანაში ომი რაც შეიძლება სწრაფად, ნებისმიერ ფასად დასრულდეს.
ომის დასრულებას გამოკითხულთა 30% ეწინააღმდეგება. კვლევაში აღნიშნულია, რომ იმ ადამიანების რიცხვი, რომელთაც ომის დასრულება ნებისმიერ ფასად სურთ, 2023 წელთან შედარებით გაზრდილია. მაშინ ასეთი სცენარი მოსახლეობის 30%-თვის იყო მისაღები, ხოლო 53%-თვის – არა.
ამავდროულად, გამოკითხვაში მონაწილეთა უმეტესობას, კერძოდ, 73% უკრაინის გამარჯვების სჯერა, ხოლო 17% – არა. აღსანიშნავია, რომ ომის დაწყების დროს უკრაინის გამარჯვების 91,5% სჯეროდა.
ამასთან ერთად, გამარჯვების ნაკლებად სჯერათ უკრაინის აღმოსავლეთ რეგიონების მცხოვრებლებს (55%). ქვეყნის სამხრეთით ასეთი ადამიანების რიცხვი 69% შეადგენს.
კითხვაზე, თუ რა იქნება რესპონდენტებისთვის ომში უკრაინის გამარჯვების მთავარი ინდიკატორი, 37% უპასუხა, რომ ყველა უკრაინელი ტყვის, დეპორტირებულისა და გატაცებულის დაბრუნება, 31% – უკრაინის სახელმწიფოებრიობის შენარჩუნება, 30% – უკრაინაზე სარაკეტო იერიშების შეწყვეტა, 27% – უკრაინული ტერიტორიების გათავისუფლება 1991 წლის მდგომარეობის მიხედვით, 23% – პუტინის ნეიტრალიზაცია.
გამოკითხვა 12 – 18 აგვისტოს პირდაპირი გამოკითხვის მეთოდით ჩატარდა. მასში 2 002 უკრაინელმა მიიღო მონაწილეობა. ცდომილება 2,3% შეადგენს.