”როგორ შეიძლება საქართველო დაადანაშაულო კურსის ცვლაში და რუსეთისკენ მიმართულების აღებაში?“

„მოდით ფაქტებით ვისაუბროთ, მინდა ვთქვა, რომ კატეგორიულად არ ვიზიარებ ამ სტატიის პათოსს, როგორ შეიძლება საქართველო დაადანაშაულო კურსის ცვლაში და რუსეთისკენ მიმართულების აღებაში? ის რეალური შედეგი რაც ჩვენ გვაქვს, აბსოლუტურად საწინააღმდეგოს მეტყველებს“, – ამის შესახებ საგარეო საქმეთა მინისტრმა დავით ზალკალიანმა, Wall Street Journal-ში გამოქვეყნებულ სტატიასთან დაკავშირებით განაცხადა.
მისი თქმით,საქართველოზე უფრო ახლო პარტნიორი დასავლეთს და აშშ-ს ამ რეგიონში არ ჰყავს, რაც გამყარებულია ფაქტებით.
“საქართველოს შეაქვს წვლილი ავღანეთში ჩვენს ნატოელ და ამერიკელ პარტნიორებთან ერთად სწრაფი რეაგირების მისიაში. ჩვენ 32 თანამემამულე დავკარგეთ ამ მისიაში.ეს ძალიან დიდი დანაკარგია ჩვენთვის, თითოეული ამ ადამიანის სიცოცხლე ჩვენთვის არის უძვირფასესი. ეს არის ჩვენი წვლილი, კონტრიბუცია იმ გლობალური გამოწვევების წინააღმდეგ, რასაც ერთად ებრძვის მთელი დასავლური სამყარო, ჩვენი პარტნიორები , ევროპა და ამერიკა. გთხოვთ, კიდევ ერთხელ, ყურადღებით გადაავლეთ თვალი, როგორი კონკრეტული შედეგები გვაქვს ამერიკასთან სტრატეგიულო პარტნიორობის კუთხით. თავდაცვის და უსაფრთხოების სფეროში ახალ სამწლიან შეთანხმებას მოეწერა ხელი რამდენიმე კვირის წინ. ეს არის საქართველოს კურსის ცვლა რუსეთისკენ?“ – განაცხადა დავით ზალკალიანმა.
მინისტრის თქმით, ქვეყნის მთავარ დოკუმენტში – კონსტიტუციაში, ასევე პარლამენტის რეზოლუციაში, საქართველოს მთავრობის დოკუმენტში, საგარეო პოლიტიკის სტრატეგიაში აღნიშნულია, რომ ქვეყნის პრიორიტეტი არის ევროპულ და ევროატლანტიკურ სტრუქტურებში ინტეგრაცია.
„კონკრეტულ ნაბიჯებს ვდგამთ, ასოცირების შეთანხმება გვაქვს, ყოვლისმომცველი თავისუფალი ვაჭრობა, ვიზალიბერალიზაცია, გაცხადებული მიზანი გვაქვს, რომ ჩვენ გვინდა ევროპული პერსპექტივა, ეს არის ქვეყნის კურსის ცვლა? თუნდაც დემოკრატიული ინსტიტუტების განვითარების თვალსაზრისით და დამოუკიდებელი ინსტიტუტების შექმნის კუთხით, განხორციელების კუთხით,მედიის თავისუფლების კუთხით, რეიტინგებში, ბიზნესის კეთების კუთხით,ინფრასტრუქტურული პროექტების განხორციელების კუთხით, რომელიც ქვეყნის სტრატეგიულ ფუნქციას ზრდის.სადაც არის ამერიკის,ევროპის ინტერესები,სადაც არის ბრიტანული და ამერიკული კომპანიების ინტერესები. ეს ყველაფერი ქვეყნის სტრატეგიული მნიშვნელობის და რეგიონში საქართველოს ფუნქციის, ისევე როგორც ევროპული და ევროატლანტიკური ინტეგრაციის დასტურია“, – განაცხადა ზალკალიანმა, რომლის კომენტარსაც საგარეო უწყება ავრცელებს.​
შეგახსენებთ, რომ Wall Street Journal სარედაქციო წერილით საქართველოში მიმდინარე მოვლენებს ეხმაურება. წერილი სათაურით „საქართველო ზღვარზე“ ბიძინა ივანიშვილის და მის მოკავშირეების მიერ „საქართველოს დემოკრატიის ძირის გამოთხრაზე“ წერს და აცხადებს, რომ ქვეყანამ თავისი კურსი მოსკოვისკენ მიმართა. Wall Street Journal-ი დონალდ ტრამპს და სახელმწიფო დეპარტამენტს მიმართავს, რომ „თუ სანქციები დაემუქრება ივანიშვილის სიმდიდრეს, ამას უფრო მეტი გავლენა ექნება, ვიდრე განცხადებებს“.