„ალია“ ესაუბრება, ცოტნე გამსახურდიას მეუღლეს, ანა ჯაბაურს:
– გავრცელდა მოწმეთა ჩვენებები თქვენი მეუღლის საქმეზე. ეთანხმებით ამ ჩვენებებს?
– არა, რა თქმა უნდა, ჯერ ერთი ახლა ვისმენთ მარტო ერთ მხარის, დაინტერესებული მხარის ჩვენებას, რომელიც დიდი ალბათობით არის დამახინჯებული და ჩვენ ჯერ კიდევ არ მოგვისმენია ცოტნესთვის.
მეორე – ამბობენ, რომ ცოტნეს ერთი ურტყამდა და დანარჩენები უყურებდნენ? ყველაფერს რომ თავი დავანებოთ, კვირას სასამართლომ, სამწუხაროდ გაათავისუფლა თორნიკე ქვათაძე, რომელიც არის გიორგი სოლოღაშვილის (ქვათაძე) ძმა – გიორგი აღიარებს რომ მან დაარტყა დანა ცოტნეს და მისი ძმა, რომელიც იქ იყო, იდგა და უყურებდა? არ ჩაერია ჩხუბში? დავუშვათ არ ქონდა დანა, არც ხელი დაარტყა? ეგ როგორ დავიჯეროთ? მესამე, იქ გამოყენებული იყო სამი იარაღი, დანა, მეორე ბასრი საგანი და კიდევ ბლაგვი საგანი – როგორ გამოიყენა ერთმა ადამიანმა სამი საგანი? ესენი ყველანი ნამდვილად დამნაშავეები არიან, როგორც მე მითხრეს პროკურატურაში და იგივე უთხრეს ადვოკატსაც და მას საქმის მასალებიც გააცნეს, ეს არის საწყისი კვლევის შედეგები, ამ ორი-სამი დღის ინფორმაცია და მართალია ერთი გაათავისუფლეს, სამწუხაროდ, არ იყო სამხილები ჯერ საკმარისი, ვერ მოიძიეს, მაგრამ, იმედია მაქვს, გამოძიება მეტ სამხილს მოიპოვებს. ველოდებით ექსპერტიზის პასუხს, დნმ-ის პასუხს, კამერების ჩანაწერების ამოღებას.
– დაკავებულთაგან ერთი არის მეზობელი და დანარჩენებს იცნობდა?
– არ უხსენებია არასოდეს არც ერთი, რაც არ ვიცი, ვერ ვიტყვი, არც ის ვიცი, სპეციალურად იყვნენ მოსულები, თუ არა.
– გავრცელდა ინფორმაცია, რომ კამათი მოხდა იმის გამო, რომ ცოტნეს მიტანილი ღვინო არ მოეწონათ, წაიღო ცოტნემ სახლიდან ღვინო?
– მე რომ მოვედი სამსახურიდან, ცოტნემ გამიღო ჭიშკარი, დაბადების დღეზე მიდიოდა და ნამდვილად არაფერი ეჭირა ხელში. 15 წუთში შემობრუნდა და გავიდა, ისევ არაფერი წაუღია, თუმცა, არც იმას გამოვრიცხავ, რომ ჩემს მოსვლამდე გაეტანა ღვინო.
– მას შემდეგ რაც ბოლოჯერ გავიდა სახლიდან, რამდენ ხანში დაჭრეს?
– სახლიდან ბოლო გასვლიდან 1 საათში დამირეკეს, მაგრამ უკვე საავადმყოფოდან დამირეკეს, ამ ერთ საათში მოხდა დაჭრაც, პოლიციის მოსვლაც, მერე სასწრაფომ დააგვიანა საცობების გამო, მერე საავადმყოფოში გადაიყვანეს, საოპერაციოდ შეიყვანეს და მერე დამირეკეს – შესაბამისად, სახლიდან გასვლის შემდეგ, მალევე დაჭრეს.
– ამბობენ, რომ გარე განათება იყო გამორთული.
– ჩვენ რომ გავედით, მე იმდენად შოკში ვიყავი, არ შემიმჩნევია, ჩემი შვილი ამბობს, კი, ბნელოდაო, მეზობლები ამბობენ, რომ გამორთული იყო გარე განათებაო.
– კამერები აყენია ირგვლივ?
– კამერები აყენია კოლხურ კოშკშიც და გარეთაც ბევრია კი. როგორც გითხარით, ამასაც ველოდებით.
– მითხარით, რომ არ ეთანხმებით გავრცელებულ ჩვენებებს, რა შეიძლებოდა ყოფილიყო დაჭრის მოტივი?
– ვერაფერს ვიტყვი, არ მაქვს ინფორმაცია, ეჭვი შეიძლება გქონდეს ყველაზე, მაგრამ სანამ მეტი ინფორმაცია არ მექნება, ვერაფერს ვიტყვი.
– საუბრობენ თუ არა იმაზე, რომ რომ შეიძლება რამე პრობლემა დაუტოვოს ჯანმრთელობის კუთხით?
– იმედი გვაქვს, რომ არა, მაგრამ ამ ეტაპზე, ჯერ ველოდებით, როგორ განვითარდება მოვლენები.
– ცოტნეს მეგობრები და ახლობლები ავრცელებენ ინფორმაციას, რომ შეიძლებოდა ამ დაჭრას ჰქონოდა პოლიტიკური სარჩული, თქვენც ასე ფიქრობთ?
– მე ეს არასოდეს მითქვამს და იმას უნდა კითხოთ, ვინც ამბობს.
– ქალბატონი მანანა იყო მოსული?
– იმ ღამეს რომ იყო მოსული, ნამდვილად ვიცი, ეზოში იდგა, მერე – აღარ. წნევამ აუწია და, როგორც ვიცი, ისიც ცუდად გრძნობს თავს.
თამო კეშელავა, „ალია“