თბილისის მერის განცხადებით, ნაგვის ურნები, რომელიც ილია ჭავჭავაძის გამზირზე დამონტაჟდება საპილოტე პროგრამაა.
ჟურნალისტები თბილისის მერისგან დაინტერესდნენ პროექტის ფინანსური კუთხით. როგორც კახა კალაძემ აღნიშნა, მონტაჟდება სპეციალიზებული ურნები, რომელიც ავტომატიზებულია და არის თანამედროვე.
„ეს არის მიწისქვეშა ურნები, რომლებიც არის სიახლე. ეს არის საპილოტე პროექტი, რომელსაც პირველად ვახორციელებთ ჭავჭავაძის გამზირზე. ეს არ არის უბრალო სანაგვე ურნები, ეს არის სპეციალიზებული ურნები, რომლებიც ავტომატიზებულია და არის თანამედროვე. ეს არის სიახლე, რომელიც იქნება განთავსებული მიწის ქვემოთ და დღეს, თუ ყოველდღიურად უწევს „თბილსერვისს“ ნაგვის გატანა, ამ კონკრეტული პროექტის განხორციელების შემთხვევაში შეიძლება, კვირაში ერთხელ მოუწიოს. ავტომატურად მიდის შეტყობინებები, როდესაც ნაგვის ურნები იქნება გადავსებული. იქნება დახურული, ვერც სუნი შეგვაწუხებს, არც ვიზუალური მხარე და ვფიქრობ, ძალიან მაგარია“, – განაცხადა კახა კალაძემ.