ჯანდაცვის კომიტეტის თავმჯდომარე დიმიტრი ხუნდაძე საქართველოში ვიზიტით მყოფ ჯანმრთელობის მსოფლიო ორგანიზაციის სპეციალურ მისიას უმასპინძლებს.
შეხვედრა გაიმართება მისიის ხელმძღვანელთან, სარა გარნერთან, ჯანმოს ევროპის რეგიონული ოფისის სამედიცინო ტექნოლოგიების და მედიკამენტების დეპარტამენტის პროგრამის კოორდინატორთან, დორინა პირგარისთან და ჯანდაცვის სისტემების მრჩეველთან ტრინ ჰაბიხტისთან. შეხვედრის მთავარი თემა კი მედიკამენტების ხარისხი და ხელმისაწვდომობაა.
დიმიტრი ხუნდაძის განცხადებით, საერთაშორისო ექსპერტებთან ერთად ფარმაცევტულ სფეროში არსებული გამოწვევების აღმოსაფხვრელად შესაძლო საკანონმდებლო ცვლილებებს განიხილავენ.
„ჯერ კიდევ რჩება გამოწვევად მედიკამენტების ხარისხი და მისი ხელმისაწვდომობა. ამიტომ ვფიქრობ, დღევანდელი შეხვედრა არის ძალიან მნიშვნელოვანი, რომელსაც დაესწრებიან ჯანდაცვის მსოფლიო ორგანიზაციის ექსპერტები. ჩვენ მათთან ერთად დავიწყებთ აქტიურ მუშაობას. მნიშვნელოვანია, რომ შესაცვლელია საკანონმდებლო ბაზა, რომელიც არის მოძველებული და ვერ პასუხობს გამოწვევებს. ეს არის 2009 წელს მიღებული კანონი, ამიტომ ჩვენ აქტიურად დავიწყებთ მუშაობას, რომ ეს ბაზა გავმართოთ და ეტაპობრივად შევძლოთ, რომ ქვეყანაში იყოს მედიკამენტების ხარისხი შესაბამისი მაღალ საერთაშორისო სტანდარტებთან და რაც მთავარია, მოსახლეობისათვის იყოს ხელმისაწვდომი“,- განაცხადა დიმიტრი ხუნდაძემ.
ჯანდაცვის კომიტეტის თავმჯდომარის თქმით, შეხვედრაზე ჯანდაცვის მსოფლიო ორგანიზაციის დელეგაციის წარმომადგენლებთან კორონავირუსის საფრთხეებთან და მის პრევენციებთან დაკავშირებითაც ისაუბრებენ.
დიმიტრი ხუნდაძის განცხადებით, საქართველო ვირუსის გავრცელების კუთხით კვლავ მწვანე ზონაში, ანუ დაბალი რისკის ზონაში რჩება, ხელისუფლება კი შესაბამისი მექანიზმების გამოყენებით მაქსიმალურს აკეთებს, რომ ვირუსის მატარებელი მოქალაქის შემოსვლა არ მოხდეს.
„ამ შეხვედრას ჩვენ გამოვიყენებთ იმისთვის, რომ ჯანდაცვის მსოფლიო ექსპერტებთან ერთად ვისაუბროთ მსოფლიო გამოწვევაზე კორონავირუსთან დაკავშირებით. იცით, რომ უხანის პროვინციაში საკმაოდ არასახარბიელო ეპიდვითარებაა. საყურადღებოა, რომ ჩვენი მოქალაქეები არიან ამ ზონაში, ხუთი მოქალაქეა. ჩვენ ძალიან აქტიურად ვმუშაობთ მათ ჩამოყვანაზე, თუმცა, რა თქმა უნდა, ჯანდაცვის მსოფლიო ორგანიზაციის რეკომენდაციების დაცვით, ასევე, საკარანტინო რეჟიმის სრული დაცვით, რადგან აქ არის ორი მიმართულება – იქ მყოფი მოსახლეობის უსაფრთხოება და ასევე ის, რომ ჩვენს ქვეყანაში შემოსვლა ნებისმიერი მოქალაქის უნდა იყოს ყველა რეკომენდაციით ყველა მექანიზმის დაცვით, რომ ადგილზე იქნას აქ მყოფი მოქალაქეების უსაფრთხოება მაღალ დონეზე დაცული. ჩვენს ქვეყანაში რისკი დღეს არის პრაქტიკულად მხოლოდ თეორიული. ჩვენ ისევ ვიმყოფებით მწვანე ზონაში ანუ დაბალი რისკის ზონაში, მაგრამ რა თქმა უნდა, ჩვენ ქვეყანაში ყველაფერი კეთდება იმისთვის, რომ არ დაფიქსირდეს შემოსვლა ამ ვირუსის მატარებელი მოქალაქეების“, – განაცხადა დიმიტრი ხუნდაძემ.