მცხეთა-მთიანეთში საგაზაფხულო სამუშაოები შეუფერხებლად გრძელდება. რეგიონის მასშტაბით მიწის დამუშავება და მარცვლეული და ბოსტნეული კულტურების თესვა აქტიურად მიმდინარეობს. კორონავირუსის ფართოდ გავრცელების პრევენციის მიზნით, ადგილზე უსაფრთხოების ნორმები მაქსიმალურად არის გამკაცრებული. აღსანიშნავია, რომ მცხეთა-მთიანეთის რეგიონი, ამ დრომდე, ე.წ. მწვანე ზონად რჩება, სადაც COVID 19-ით ინფიცირების არც ერთი ფაქტი არ გამოვლენილა.
მცხეთა-მთიანეთის სახელმწიფო რწმუნებულმა შალვა კერესელიძემ, მცხეთის მუნიციპალიტეტში ერთ-ერთი ფერმერული მეურნეობა მოინახულა და ადგილზე მიმდინარე სამუშაო პროცესს გაეცნო. ფერმერს 2 ჰა მიწის ფართობზე 8 სახეობის სალათის ფურცელი მოჰყავს. წარმოებული პროდუქციის რეალიზაციას ფერმერთა სადისტრიბუციო ქსელის საშუალებით ახორციელებს. სასალათე მეურნეობის წლიური წარმადობა დაახლოებით 30 ტონას შეადგენს. ფერმერი ბოსტნეული კულტურების სასათბურე მეურნეობის მოწყობასაც გეგმავს.
გარემოს დაცვისა და სოფლის მეურნეობის სამინისტრო და სამინისტროს რეგიონული სამსახურები ფერმერებთან და მიწათმოქმედებთან მუდმივ კოორდინაციაში არიან და დარგობრივთან ერთად, კორონავირუსის გავრცელების პრევენციის მიზნით, შესაბამის კონსულტაციებსაც უწევენ.
ცენტრალური და ადგილობრივი ხელისუფლების შესაბამისი უწყებები კოორდინირებულად მუშაობენ, რათა მცხეთა-მთიანეთის რეგიონისა და მთლიანად ქვეყნის მასშტაბით სასოფლო-სამეურნეო სამუშაოები შეუფერხებლად განხორციელდეს.