კორონავირუსზე დადასტურებული შემთხვევების რაოდენობა 24 საათში 11-ით გაიზარდა. ახლადინფიცირებული პირებიდან 10 ბოლნისის კლასტერს მიეკუთვნება.
ქვემო ქართლის სახელმწიფო რწმუნებულის შოთა რეხვიაშვილის განცხადებით, 6 შემთხვევა დაფიქსირდა სოფელ მუშევანში, 3 სოფელ გეტაში და ერთი სავანეთში, რომელიც კარანტინში იმყოფებოდა.
ამ დროის მონაცემებით, მხოლოდ ქვემო ქართლის რეგიონში კოვიდ ინფიცირების 194 დადასტურებული ფაქტია.
რწმუნებულის ინფორმაციით, ათივე ინფიცირებულის წყარო დადგენილია.
“ბოლნისში 174 საკვლევი მასალა იყო აღებული იმ ახალი გავრცელებების მჭიდრო კავშირებიდან, რომელთა გადაზღვევა აუცილებელია. ყველა კონტაქტი ცნობილია და ეს მასშტაბური და საჭირო ქმედება იყო იმისათვის, რომ კიდევ უფრო მეტი საშუალება მოგვეცეს, განვსაზღვროთ რისკ-ჯგუფები,” – განაცხადა შოთა რეხვიაშვილმა.
სოფელი მუშევანი 26 აპრილის შემდეგ იყო ჩაკეტილი. რამდენიმე დღის წინ იქ კორონავირუსი დაუდასტურდა 10 ადამიანს, თუმცა ისინი კლინიკაში გადასვლაზე უარს აცხადებდნენ. დაპირისპირების შედეგად დაზიანდა სასწრაფო დახმარებისა და ადგილობრივი მუნიციპალიტეტების ავტომობილები. პაციენტების გადაყვანა მედიკოსებმა 20 საათიანი მოლაპარაკების შემდეგ მოახერხეს. სავარაუდოდ ამ ადამიანებთან კონტაქტს უკავშირდება დღეს გამოვლენილი 6 შემთხვევა.