“საქართველოში არანაირი პოლიტპატიმრები არ არსებობენ, ჩვენ გვყავს კონკრეტული პირები, ვისაც კონკრეტული დანაშაულებები აქვს ჩადენილი”, – ამის შესახებ დედაქალაქის მერმა კახა კალაძემ ოპოზიციის განცხადების საპასუხოდ განაცხადა, რომლებიც ამბობენ, რომ პოლიტპატიმრები უნდა გათავისუფლდნენ.
მისი თქმით, 2020 წლის 8 მარტს, როდესაც ხელისუფლება და ოპოზიცია ახალ საარჩევნო მოდელზე შეთანხმდნენ, პატიმრების (გიორგი რურუა, გიგი უგულავა, ირაკლი ოქრუაშვილი) გათავისუფლებაზე საუბარი არ ყოფილა.
“რაც შეეხება საკონსტიტუციო ცვლილებებს საარჩევნო სისტემასთან დაკავშირებით, პარტია “ქართული ოცნება” არის სრულ მზადყოფნაში, რომ ეს ცვლილებები განხორციელდეს, თუ ამას ოპოზიცია ჩააგდებს, ეს რა თქმა უნდა იქნება მათი პასუხისმგებლობა და მოგვიწევს არჩევნების ჩატარება იმ საარჩევნო სისტემით, რომელიც ათეული წლების განმავლობაში ტარდებოდა”, – აღნიშნა კახა კალაძემ.
ცნობისთვის, საკონსტიტუციო ცვლილების პროექტის თანახმად, 2020 წლის საპარლამენტო არჩევნები 120/30-ზე მოდელით და 1%-იანი ბარიერით ჩატარდება. 120/30-ზე მოდელი გულისხმობს, რომ პარლამენტში პროპორციული სიით 120 დეპუტატი შევა, მაჟორიტარი კი, 30 იქნება.
