დღეს ოპოზიცია სთხოვს ქართულ ოცნებას არა მეორე პირობის შესრულებას, სადაც წერია, რომ პოლიტიკა არ უნდა ჩაერიოს მართლმსაჯულებაში, არამედ პირიქით, ამ შეთანხმების დარღვევას – ამის შესახებ ანალიტიკოსმა ლადო ბოჟაძემ გადაცემა „დღის ქრონიკაში“ განაცხადა.
მისივე თქმით, პოლიტიკური ინტერესებით მართლმსაჯულებაში ჩარევა „ნაციონალური მოძრაობისთვის“ ჩვეული ხელწერაა.
„რა თქმა უნდა „ნაციონალური მოძრაობისა“ და „ევროპული საქართველოსთვის“ სრულიად წარმოუდგენელია, როდესაც ისინი ხელისუფლებაში იყვნენ, ასეთი პირობა ეთქვათ და არ შეესრულებინათ. ირაკლი ოქრუაშვილი გახსოვთ თქვენ, როგორ დაიჭირეს, როგორ გამოუშვეს, შემდეგ როგორ გააძევეს ქვეყნიდან. ასევე გვახსოვს პრეზიდენტის ჩართულობაც. სააკაშვილი იღებდა პოლიტიკურ დაკვეთებს საკუთარი გუნდისგან. მან გამოუშვა გირგვლიანის მკვლელები იმიტომ, რომ ასეთი იყო მისი პოლიტიკური გუნდის შეთანხმება ამ დამნაშავეებთან. ორი დოკუმენტი იმიტომაც შეიქმნა ცალცალკე და არ შეიძლება მეორე დოკუმენტი იყოს წინაპირობის შესრულების გარანტია, რადგან ამ შეთანხმებაზე საუბარი არის არა მხოლოდ საპარლამენტო ოპოზიციის, არამედ არასაპარლამენტო ოპოზიციის ინტერესებზე. მთელი პოლიტიკური სპექტრის ინტერესია, რომ შევცვალოთ საარჩევნო სისტემა და ჩავატაროთ არჩევნები ახალი სისტემით. თქვენ გახსოვთ ამ შეთანხმების წინაპირობა. მაშინაც „ნაციონალური მოძრაობა“ ცდილობდა, რომ არცერთი შეთანხმება შემდგარიყო, დარჩენილიყო ძველი საარჩევნო სისტემა. ერთადერთი მიზეზით, რომ მუდმივად ესაუბრათ სისტემის უსამართლობაზე, არალეგიტიმურობაზე. იმისთვის, რომ 31 ოქტომბრისთვის კი არ მომზადებულიყო „ნაციონალური მოძრაობა“, მომზადებულიყო პირველი ნოემბრისთვის“, – განაცხადა ბოჟაძემ.