თოქ-შოუ „არენა“ „იმედის“ ეთერში“ გუშინ ცვლილებებით გავიდა. ვაკა გორგილაძის ნაცვლად, გადაცემაში რუსა შელიას თანაწამყვანი ექსპერტი გია აბაშიძე იქნება.
„პრაიმტაიმი“ გია აბაშიძეს ესაუბრა.
– ბატონო გია, გუშინ ტელეწამყვანის რანგში მოევლინეთ მაყურებელს, როდის მიიღეთ ეს შემოთავაზება?
– რამდენიმე დღის წინ მივიღე არხის მენეჯმენტისგან ეს შემოთავაზება, რასაკვირველია, დიდი პასუხისმგებლობა იყო და დავთანხმდი.
ვაკა დროებით გადასულია სხვა საქმიანობაში, თუ არ ვცდები ახლა, საქართველოშიც არ არის და მის ნაცვლად მე ვიქნები წამყვანი.
მისი კრიტიკული აზრი მაინტერესებდა და ეთერის დასრულების შემდეგ, მქონდა კომუნიკაცია. ბუნებრივია ვღელავდი პირველ ეთერში, მაგრამ ყველაფერმა ნორმალურად ჩაიარა. უამრავი კომპლიმენტი და შექება მივიღე, ახლა ველოდები ახლობლებისგან კონსტრუქციულ კრიტიკას -რა არის გამოსასწორებელი.
– ეთერამდე არ გქონიათ გორგილაძესთან საუბარი?
– არა, არა. თანაწამყვანთან და პროდიუსერთან გავიარე თემები, დავწერეთ ე.წ. „ვიორტსკა“ და შევედით ეთერში.
– როგორი იქნება თქვენი როლი „არენაში“?
– მე ხელმძღვანელობამ მითხრა ჩემი როლი თავად ავირჩიო. ვირჩევ ისეთ როლს როგორიც არის ევროპულ და ბრიტანულ არხებზე, ჩემთვის სამაგალითოა.
არ მიწყინონ კოლეგებმა, ქართულ არხებს და შოუებს არ ვუყურებ. მირჩევნია „ბიბისის“ და „channel 4” სტილში წავიყვანო გადაცემა. ნაკლები ემოცია, მეტი ინფორმაცია და მეტი შინაარსი იყოს ჩემს გადაცემაში.
როგორც რესპოდენტი ყველა არამავნებელ მედიასაშუალებასთან თანამშრომლობას ვაგრძელებ. ამავე დროს სამშაბათ საღამოს, როგორც წამყვანი, თოქ-შოუ „არენაში“ შევაჯამებ საინტერესო თემებს.
სტუმარს და წამყვანს შორის განსხვავება არის, მაგრამ კამერასთან მორიდება და შიში არ მაქვს. იქეთ სკამზე ვიჯდები თუ აქეთ სკამზე მნიშვნელობა არ აქვს.
– ახლა როცა კარანტინია, საინტერესოა როგორ მოახერხა ვაკა გორგილაძემ ქვეყნიდან გასვლა, რა ინფორმაცია გაქვთ სად არის ის და რა სფეროში გადაინაცვლა?
– ნამდვილად არ ვიცი სად არის და როგორ მოახერხა ქვეყნიდან გასვლა. მითხრა მედიაპროდუქტს ვაკეთებ და მოგვიანებით გეტყვი, რადგან არ მინდა მოვლენებს გავუსწროო.
მეც ასე ვარ, რაღაცას სანამ არ გავაკეთებ არ ვამბობ. ვისთან ერთად აკეთებს და მსგავსი დეტალები არ ვიცი. შედეგი არ დაიმალება, რადგან მედიაპროექტია.
– ვინაიდან საკუთარ მედიაპროექტს აკეთებს ე.ი. გორგილაძე „არენაში“ აღარ დაბრუნდება…
– შეიძლება დაბრუნდეს რამდენიმე კვირაში ან რამდენიმე თვეში.