მაისის ბოლოდან საქართველოში პრეპარატი რემდესივირი შემოვა. ეს ნიშნავს, რომ ქვეყანა სოლიდარობის საერთაშორისო კვლევაში ჩაერთვება. რემდესივირის გარდა კვლევაში მონაწილეობს კიდევ 3 სხვა პრეპარატი, რომელსაც ექიმები შერჩევით გამოიყენებენ.
როგორც ჯანდაცვის მინისტრის პირველი მოადგილე, თამარ გაბუნია აცხადებს, პრეპარატ რემდესივირის გამოყენება სოლიდარობის კვლევის ფარგლებში მოხდება და მასში ინფექციური საავადმყოფოს გარდა, კიდევ 6 კლინიკა ჩაერთვება.
მისი თქმით, რემდესივირი მხოლოდ მძიმე პაციენტების მკურნალობისთვის გამოიყენება. თამარ გაბუნიას თქმით, სწორედ ამაზე იქნება დამოკიდებული, რა რაოდენობის რემდესივირი ჩამოვა ქვეყანაში.
“რემდესივირის გამოყენება ქვეყანაში მოხდება სოლიდარობის კვლევების ფარგლებში, რომლის ფორმალიზაციის პროცედურები დასრულდა და ახლა უკვე მიმდინარეობს ტრენინგის დაგეგმვის ეტაპი. 6 კლინიკაა ინფექციური საავადმყოფოს გარდა, რომელიც იქნება მთავარი მკვლევარი ამ შემთხვევაში. ეს არის ის ძირითადი კლინიკები, რომლებიც აქამდე მართავენ კოვიდ პაციენტებს. რაც შეეხება იმას, თუ რამდენი ჩამოვა პრეპარატი ქვეყანაში, ეს დამოკიდებული იქნება იმაზე, თუ რამდენი პაციენტი იქნება ისეთი, ვინც დააკმაყოფილებს შერჩევის კრიტერიუმს, ამ შემთხვევაში, რემდესივირი რეკომენდებულია მხოლოდ მძიმე პაციენტებისთვის, რომელთაც უტარდებათ ჰოსპიტალური მკურნალობა,“ – აცხადებს თამარ გაბუნია.