„მთავარი არხის“ ინფორმაციით, გუშინ, ქუთაისში, გელათის ტაძართან ცეცხლსასროლი იარაღიდან ისროდნენ.
„პრაიმტაიმმა“ გაარკვია იმ პირის ვინაობა, რომელიც ტელეკომპანიის მიერ გასაჯაროებულ კადრებში ფიგურირებს.
ის ადგილობრივი მკვიდრი რუსლან რუსაძეა. აღმოჩნდა, რომ სროლა არა ცეცხლსასროლი, არამედ სასიგნალო იარაღიდან (ე.წ. სტარტოვკა) განხორციელდა.
რუსაძე ამბობს, რომ ახლობლის ქორწილში იმყოფებოდა, რა დროსაც სასიგნალო იარაღიდან ჰაერში ისროლა.
ე.წ. სტარტოვკა სპეციალურ მაღაზიებში უპრობლემოდ იყიდება და მისი შეძენა ნებისმიერს შეუძლია გამომდინარე იქიდან, რომ ცეცხლსასროლ იარაღად არ განიხილება და მისი ფლობა დანაშაულს არ წარმოადგენს.
„ხმოვანი, სტარტოვკა ვისროლე, სასიგნალო იარაღია. თქვენც და ნებისმიერს შეუძლია ამის ყიდვა, ეს დანაშაული არაა. ცეცხლსასროლი იარაღი არაა, გაყიდვაშია ჩვეულებრივ და უპრობლემოდ იყიდება ყველაზე. გამომძიებლები იყვნენ მოსულები, ამოიღეს და დალუქეს სტარტოვკა, შეამოწმებენ და ალბათ დამიბრუნებენ. სასიგნალო იარაღი, რაღაც სათამაშო როდიდან გახდა დანაშაული?!“, – ამბობს რუსლან რუსაძე.
სროლა ქუთაისის ცენტრში “პოსტ ფაქტუმის” გადამღები ჯგუფი, სიუჟეტის გადასაღებად იყო წასული, როცა გელათის შესასვლელთან სროლას შეესწრნენ – ამ შინაარსის ინფორმაცია „მთავარმა არხმა“ გაავრცელა.
კადრები “პოსტ ფაქტუმში” ჟურნალისტმა გიორგი გაბუნიამ გაასაჯაროვა.
“მთავარი არხის” დამფუძნებელი ხომ ჩასვით ციხეში იარაღის უკანონო ტარება-შენახვის შეთითხნილი ბრალდებით? ახლა აგერ გიჩვენებთ რეალური დანაშაულის ფაქტს. გაშიფრეთ კადრები, რომელიც გაჩვენეთ – იქ საკმაოდ კარგად ჩანს მანქანების მოდელიც და ნომერიც. გამოიძიეთ, გაარკვიეთ და დამნაშავეები დასაჯეთ”, – ამბობს გიორგი გაბუნია.