გიორგი შქარაშვილის მკლველობაში ბრალდებულ არჩილ გაგნიძის დას სჯერა რომ მისი ძმა უდანაშაულოა და ცდილობს ამაში საზოგადოებაც დაარწმუნოს.
„მითხრა, არ ვიცი, მეკითხებიან ბავშვზე, რომელიც იმ ღამეს დაიკარგა, როცა ჩვენ მცხეთის მაგისტრალზე ვიყავით, მაგრამ მისი გაუჩინარების მიზეზების შესახებ არაფერი ვიციო. ჩემმა ძმამ მეც ზუსტად ის ამბავი მომიყვა, რასაც გამოძიებას უყვება – უყვება რადიო თავისუფლებას არჩილ გაგნიძის და თინათინ გაგნიძე
„მთელი ის დღეები მშვიდად იყო, რადგან იცოდა, რომ არაფერი ჩაუდენია და ვერც იმას წარმოიდგენდა, რომ მოვლენები ასე შეიძლებოდა განვითარებულიყო. უბრალოდ, ჩვენ ყველანი, ისევე როგორც სხვები, იმაზე ვდარდობდით, რომ ბავშვი იყო დაკარგული და მის გამოჩენას ველოდით“, – ამბობს თინათინ გაგნიძე “რადიო თავისუფლებისთვის” მიცემულ ინტერვიუში. ის ამბობს რომ მისი ძმა პატიოსანი და მორწმუნე ადამიანია.
„მთელი ცხოვრება შრომაში აქვს გატარებული, განსაკუთრებით, მას შემდეგ, რაც ინსულტის შემდეგ მამა დაგვიინვალიდდა. ხან მშენებლობაზე მუშაობს, ხან გზების სამღებრო სამუშაოებზე, ტაქსის მძღოლიც იყო, ნარჩენებიც კი გაუტანია თავისი ზურგით. თავისი შრომით შოულობდა ჩვენთვის სარჩო-საბადებელს. მამაჩემის წამლის ფული იყო თუ ოჯახში სხვა რაიმე საჭიროება, თავისი შრომით ყიდულობდა. პატიოსანი და მორწმუნე ადამიანია. მოიკითხეთ ვინ არის, როგორი ადამიანია
„გამოძიებამ, სავარაუდოდ, ძალიან კარგად იცის, ვინც ჩაიდინა დანაშაული. თუკი, არსებობს მტკიცებულებები, რომ “კამრიში” მსხდომებმა ჩაიდინეს დანაშაული, გამოაქვეყნონ, რატომ არ აქვეყნებენ? მათ არაფერი უჭირავთ ხელში. რომელ მტკიცებულებებზე ლაპარაკობენ? ამირხანაშვილის ხუთჯერ შეცვლილ თუ ვითომ დაზუსტებულ ჩვენებებზე? ეს არის ცრუ ჩვენებები და მეტი არაფერი“- აღნიშნა თინათინ გაგნიძემ.