სოფელ ძევრში გარდაცვლილი 11 წლის ბიჭის დაკრძალვა ამ დრომდე ვერ ხერხდება – ოჯახი დედის ჩამოსვლას ელოდება. არსებული ინფორმაციით, ის თბილისში დღეს საღამოს ჩამოფრინდება. მას აეროპორტში PCR ტესტი ჩაუტარდება და ამის შემდეგ თავისუფლად გადაადგილების საშუალება მიეცემა. 10 წლის წინ, ემიგრაციაში წასული ნესტან აბჟანდაძე სამშობლოში დასაბრუნებლად, საბერძნეთიდან, რამდენიმე დღის წინ გამოემგზავრა, თუმცა პასპორტის ვადის გასვლის გამო, მესაზღვრეებმა ის თურქეთის ტერიტორიაზე არ შეუშვეს. შვილმკვდარი დედის დაბრუნების პროცედურა სწორედ ამ მიზეზით გაჭიანურდა. არსებული ინფორმაციით, 11 წლის ბიჭს სამშაბათს დაკრძალავენ.
გარდაცვლილი მოზარდის და ადასტურებს, რომ დედას დღეს ელოდებიან, ის ასევე საუბრობს იმაზეც, რომ მამა წარსულში მათზეც ძალადობდა, თუმცა ამბობს, რომ მათგან განსხვავებით მამა მათ უმცროს ძმაზე არა ფიზიკურად, არამედ ფსიქოლოგიურად ძალადობდა.
“ჩვენთან ძალადობდა, ათულიკოზე არ გვახსოვს რომ ეძალადა, ათულიკოზე ფსიქიკურად ძალადობდა, ვართ გაჩუმებული იმიტომ, რომ ექსპერტიზის პასუხები რომ მოვა, იმისდა მიხედვით გადაწყდება ყველაფერი,” – აცხადებს გარდაცვლილი მოზარდის და.
11 წლის მოზარდი, თერჯოლის მუნიციპალიტეტის სოფელ ძევრში, 23 აგვისტოს საკუთარ ეზოში გარდაცვლილი იპოვეს. თვითმკვლელობამდე მიყვანასა და ოჯახში ძალადობის ფაქტზე ბრალდებული მოზარდის მამაა.