24-დღიანი მკაცრი შეზღუდვის შემდეგ მესტიის მუნიციპალიტეტი გაიხსნა. საკარანტინო შეზღუდვების მოხსნის მიუხედავად მოსახლეობის თერმოსკრინინგი აქტიურად გაგრძელდება. ამისთვის სპეციალისტები დასახლებებში არსებულ ვითარებას გააკონტროლებენ.
ადგილობრივები აცხადებენ, რომ მიუხედავად იმ დისკომფორტისა, რომელიც გამოწვეული იყო ტერიტორიის ჩაკეტვით, მათ პირველად საჭიროებებზე პრობლემა არ შექმნიათ.
მესტიის მერის კაპიტონ ჟორჟოლიანის განცხადებით, ისინი უკვე ემზადებიან ტურისტული სეზონის გასახსნელად.
“ვემზადებით ახლა იმისთვის, რომ სტუმრები მივიღოთ და გაიხსნას ტურისტული სეზონი. მაქსიმალურად მობილიზებული ვართ იმისთვის, რომ მივიღოთ ტურისტები. რაც შეეხება ეპიდემიოლოგებს, აქ მუშაობა გრძელდება. ჩვენ მივიღეთ დიდი გამოცდილება ამ დროის განმავლობაში და ადგილზეც გვყავს ისეთი სპეციალისტები, რომლებიც გააგრძელებენ და იმუშავებენ ყველა შესაძლო შემთხვევის გამოვლენაზე. ცხელების ცენტრთან მიმართებაში მაქსიმალურად უკვე მომზადებულია ჩვენი ამბულატორიაც რომ მიიღოს ყველა პაციენტი,” – განაცხადა მესტიის მუნიციპალიტეტის მერმა კაპიტონ ჟორჟოლიანმა.
რთული ეპიდსიტუაციის გამო სვანეთში მუნიციპალიტეტი 10 აგვისტოს ჩაიკეტა.